TAGBILARAN CITY, Bohol (PIA) — Mokabat sa 405 ka ektaryas nga humayan nga maoy panginabuhian sa 800 ka mga mag-uuma ug ilang mga banay maoy benepisaryo sa gitutokan na karon nga Hibale Small Reservoir Irrigation Project (SRIP) sa Hibale Danao, Bohol.
Kon mahuman na pohon sa 2028, ang Hibale SRIP nga usa ka earthfill dam, makapatubig sa mga kabasakan sa upat ka barangay sa Danao: Hibale, Nahud, Poblacion ug Santo Nino, matud pa sa information officer sa National Irrigation Administration Region (NIA) Region 7 nga si Zarline Sambas.
Kini usab samtang ang mga dagkong opisyal ug mga stakeholders sa nahisgutang proyekto nagkatapok na didto sa NIA Central Office Command Center alang sa pre-construction conference sa nahisgutang proyekto.
Segun pa sa NIA, ang Hibale SRIP nagtumong sa pagpadugang sa produksyon sa mga humayan sa Danao pinaagi sa pagpamaayo pa sa patubig sa mga humayan sa mga nahisgutang barangay.
Mismo sila NIA Senior Deputy Administrator Engr. Robert C. Suguitan, Deputy Administrator for Engineering ug Operations Sector Engr. C’zar M. Sulaik, ug Region VII Acting Manager Engr. Antonio B. Gujeling maoy nanguna sa paghisgut-hisgot ug paglatag sa mga laraw aron mapatuman nga walay bugto ang proyekto.
Matud sa NIA, kauban sa ilang mga gihisgutan ang plano sa pagpatuman sa proyekto, ang pagtuki sa geography sa lugar nga tukoran sa earthfill dan ug mga estraktura nga magsuporta niini, ang ipatuman nga electro-mechanical works, ug ang mga responsibilidad sa kontraktor nga maoy mopatuman sa proyekto.
Nahibaw-an usab nga ang Sta. Clara International Corporation, kinsa maoy nakadaug nga bidder sa konstraksyon, una na nga mipakita sa ilang mga estratihiya alang sa walay sami nga pagpatuman sa proyekto. (PIABohol)
