WALA gikalipay sa mga dumadapig ug lumilihok sa Team Albur ang character assasination o ang pamersonal nga atake gikan sa kampo ni Albur Mayor Don Ritchie Buates.
Subay niini, mas ganado pa hinuon ang mga kandidato sa Team Albur pinangulohan ni Ritchel Lim ug Dandan Samar nga iladlad ang mga plataporma ug mga pamaagi nga matabangan ang mga nagkadaiyang sektor sa Albur.
Si Lim, usa ka konsehal ug masamong ni kanhi bise gobernador Atty. Dionisio D. Balite, Ph.D. Siya ang brother-in-law ni Senior Board Member Dionisio Victor A. Balite, Ph.D ug Engr. Dionisio Neil A. Balite, Ph.D kinsa kandidato pagka mayor sa lungsod sa Valencia.
Lakip sa plataporma de gobyerno sa ilang grupo mao ang maayong social services nga wala nahatagan sa pagtagad sa kasamtangang administrasyon.
Apil na niini ang paghatag sa birthday cake ug cash ngadto sa mga Senior Citizens, financial support ug scholarship grants sa mga estudyante nga gusto makahuman sa pagskwela.
Dugang pa sa ilang grupo nga mas hatagan sa pagtagad ang transparency sa tanang transaksyon sa gobyerno.
Kini human nagdumili ang kasamtangang mayor nga i-publish ang mga ngalan sa tanang beneficiary sa SAP kaniadto kay suma pa, “confidential” kini.
Ang walay pili-pili nga pagsebisyo sa katawhan usa usab sa mga gibandera sa Team Albur sanglit daghan na ang nakasaway sa dili patas nga implementasyon sa mga polisiya sa kasamtangang namunuan. (Kahlil Lester O. Camba)
