MITANYAG sa ubos nga presyo ang Richli Water sa treated water nga ilang gitanyag nga ibaligya ngadto sa local government unit (LGU) Balilihan, gikan sa original nga P24 per cubic meter ngadto sa P19 o mas ubos og P5 per cubic meter.
Kini segun sa suwat sa Richli Water ngadto kang Balilihan mayor Pureza Veloso Chatto pinetsahan og Abril 18, 2022 ug matod pa nga andam sila uban sa ilang technical team nga dapiton aron mopresentar sa proposal.
Kalabot sa company profile sa Richli, corporate papers ug tanang certificates/permits nga gikinahanglan sa pagpahigayon og negosyo, kini ilang personal nga ihatod ngadto sa buhatan sa mayor ugma Lunes, Abril 25 2022 sa alas 10:00 sa buntag.
Matod ni Engr. Gerry Araneta, general manager sa Richli Water nga andam pa gani ang board of directors nga mohatag nga libre sa paggamit sa water permit/rights sa Bugwak Spring alang sa LGU Balilihan isip kabahin sa corporate social responsibility sa kompaniya. (RTB)
