MGA kaparian dinhi sa lalawigan niawhag sa mga kandidato alang sa eleksiyon sa sunod tuig nga dili gamiton ang pista alang sa ilang politikanhong ambisyon ilabi na nga hugopan kini sa liboan ka magtutuo.
Matud sa usa ka pare nga dili lang magpila nga ilaha gihapong ikonsidera nga mga deboto sa usa ka santos nga magpista ang mga politiko apan mas maayo nga dili lang kaayo sila mohimo sa ilang mga kalihokan kalabot sa politika ug ilahang ikonsidera usab ang uban nga mga magtutuo.
Nagkanayon ang tinubdan nga mas maayo usab nga ang mga politiko mosul-ob og sinina subay sa relihiyoso nga kalihokan ug moapil sa selebrasyon isip magtutuo ug makighiusa sa uban.
Ug kong mahimo ang mga political aspirant kong mosulod sa mga Simbahan mas maayo nga ang isul-ob nga sinina dili sa ilang tinguha nga magpapili nga makaagaw na hinuon sa atensiyon sa mga magtutuo.
Sa laing bahin, kagahapon ug karong adlawa ang lungsod sa Maribojoc nagsaulog sa ilang tinuig nga kapistahan pahinungod sa ilang patron nga si San Vicente Ferrer.
Ug sa sunod nga buwan ang mga lungsod sa Catigbian, Baclayon, Sierra-Bullones, ug uban pa magsaulog na usab sa ilang tinuig nga pangilin diin gipahimangnuan ang mga politiko nga dili mangampanya atol sa selebrasyon. (RTB)
