GIPANGULUHAN ni Gobernador Erico Aristotle “Aris” Aumentado didto sa Valencia Astrodome, Oktubre 14, ang pagpanghatag sa ayuda nga mikabat og P485,000 para sa mga biktima sa sunog sa Valencia Public Market, kaniadtong Septyembre 16 niining tuiga.
Ang maong pondo gikan sa Kagamhanang Probinsyal, pinaagi sa Office of the Provincial Social Welfare and Development (OPSWD), ubos sa programa nga Assistance to Individuals in Crises Situation (AICS)
Ang nahisgutang sunog milamoy sa mga kabtangan sa 68 ka mga pamilya, nga kasagaran kanila namaligya og utanon, karne ug isda
Si Aumentado uban sa OPSWD head Carmelita Tecson, nanghatag sa tag P10,000 ngadto sa mga totally damage ang kabtangan ug laing 39 ka mga pamilya, diin, partially damaged ang kahimtang sa negosyo niini, nakadawat usab sa tag P5,000 kansang pondo naggikan sa nahisgutan nga P485,000
Atol sa maong kalihukan, gipadangat ni Gobernador Aumentado ang mensahe sa padayon nga pagkugi taliwala sa mga pagsulay sa kinabuhi ug dili angay nga madiskurahe
“Sad to say ang inyong panginabuhian, tested apan maningkamot kami Sa Provincial Government nga naa mi ikahatag nga makahupay sa inyong gibati,” matud ni Aumentado
Si Enrique Gabas, mipadayag sa iyang kaguol nga nasunog ang iyang gihaguan pagpundar nga kabtangan apan mapasalamaton kini gumikan kay anaa ang Gobernador nga abtik nagtabang sa mga nanginahanglan. Hangyo ni Enrique mahuman na unta ang Merkado aron mahibalik sila sa ilang normal nga kahimtang
Si Aumentado nagkanayon nga andam ang administrasyon, pagsuporta kung unsa man ang kakuwangan sa merkado publiko sa Valencia
Samtang sa laing bahin, gipahibalo ni Valencia Mayor Dionisio Neil Balite, nga ang LGU Valencia nagpadangat na og ayuda sa mga nasunugan, Septyembre 19, diin sa totally damaged ang mga kabtangan, tag P10,000 ang ilang gipanghatag, ug ang mga partially damaged, ang ilang kabtangan, tag P8,000 ang mga nadawat niini.
Midugang pagpahibaw si Balite nga gihatagan usab og laing ayuda ang mga nasunogan sa susamang kantidad pinaagi sa pundo ni Speaker Martin Romualdez.
Ang maong kalihukan gitambongan ni Gobernador Aris Aumentado, OPSWD head Carmelita Tecson, ug ang mga empleyado nga sila si Hannah May Bullecer ug Floriza Singcol, Mayor Balite, Vice Mayor Aristotle Cometa, SB Member Arman Namoc, ang MSWD Head Mary Grace Lim, ug mga empleyado. (RTB)
