SAMTANG ang kapintasan sa trabahoan mahimong mahitabo sa daghan ug uban pang mga propesyon ug sektor, kini nga isyu nakaapekto pag-ayo sa industriya sa pag-atiman sa kahimsog sumala pa sa unang ginang sa Bohol ug labing una nga babayeng magbabalaod sa Segundo distrito CongW. Vanessa Vanvan C. Aumentado.
Sa personal nga panahum ning pamantalaan ni CongW. Vanvan, ang mga trabahante sa pag-atiman sa panglawas (nurses) kanunay nga mas daling madala sa kapintasan kaysa sa ubang mga propesyon ug nag-atubang sila og lain-laing matang sa diskriminasyon ug harasment, o mas grabe pa.
Naguol ang kongresista sa balita sa pagpatay sa usa sa mga nars dinhi sa Bohol diin iyang gikondenar ang buhat sa pagpatay o bisan unsang matang sa kapintasan ug pagpanghadlok sa mga trabahoan nila.
“Sa ngalan sa akong pamilya, akong gipahayag ang akong lawom nga pahasubo sa mga namatyan nga mga miyembro sa pamilya ug mga minahal,” sigon pa ni CongW. Vanvan.
Dugang ni CongW. Vanvan nga daghang mga krimen karong panahona ang nahitabo diin ang mga tawo nga dili lig-on sa pangisip ang responsabli.
Isip usa ka nars ug usa ka magbabalaod, ang magbabalaod karon nagtrabaho sa paghimo og usa ka balaodnon bahin sa pagtukod sa usa ka Mental Health Rehabilitation Center alang sa probinsya sa Bohol.
Sigon pa sa kongresista nga kon wala siya masayop, si kanhi Cong, ug karon Bohol Gov Aris Aumentado niduso og balaudnon mahitungod sa pagtukod og Drug Rehab Center sa Munisipyo sa CPG, apan wala maaprobahan ang maong balaudnon.
“Mao nga, nanghinaut ko ug nag-ampo nga molambo kining maong balaudnon nga akong gipasa kay nakita nako ang daghang kaayohan niini kanatong tanan, usa niini mas luwas ug mas himsog nga dapit alang kanato,” sigon pa ni CongW. Vanvan..
Dugang pa ni CongW. Vanvan nga isip magbabalaod, siya mi co-author sa HB 6416 kon “An Act Strengthening the Mental Health Services of State Universities and Colleges and Appropriating Funds Therefor” ng aprobado na sa Kamara-Baha ug ksantangan anaa karon sa Senado.
Co-author usab si Aumentado HB 6574 kon “An Act Strengthening the Promotion and Delivery of Mental Health Services in Basic Education through the Hiring and Development of Mental Health Professionals and Appropriating Funds Therefor” nga aprobado na usab sa ubos balay-balauranan ug kasamtangan nga gituki karon sa Senado.
Gipasabot sa magbabalaod nga ang mga serbisyo sa kahimsog sa pangisip mapuslanon sa pagpakunhod sa peligro sa mga sakit nga may kalabutan sa stress, kabalaka, depresyon ug pag-abuso sa sangkap ug ang paghatag importansya ug pagtagad sa mga isyu sa kahimsog sa pangisip makatabang sa pagluwas sa mga kinabuhi.
Dugang ni CongW. Vanvan nga makatabang usab ang duha ka giproponer nga balaudnon sa pagpalambo sa panglantaw sa mga tawo nga tingali nawad-an og paglaum ug pagsalig sa ilang kaugalingon ug sa kinabuhi sa kinatibuk-an.
“Magpadayon kita sa pagtinabangay padulong sa pagkab-ot sa usa ka mas maayo, mas luwas ug mas himsog nga mga trabahoan alang kanatong tanan,” panapos sa babayeng magbabalaod sa Segundo distrito Vanvan Aumentado.
NIPATAY GIKASUHAN NA
NAPASAKAAN na og kasong murder ug physical injury ang 31 anyos nga lalake nga nidunggab patay sa nurse gamit ang gunting sa Bohol Doctor’s Hospital sa Barangay Bool, syudad sa Tagbilaran, ning lalawigang Bol-anon.
Kahinumduman nga samtang giatiman sa 51-anyos nga nurse ang suspek aron makagawas na sa tambalanan nikuha matud pa sa gunting sa nurse station ang suspek ug gidunggab ang nurse sa nagkadaiyang parte sa lawas niini.
Nasamdan sab ang usa ka utility worker kay giapil og dunggab sa dihang misuway og tabang sa nurse. Gikatahong nasuko ang suspek kay wala makauyon sa gipanulti sa nurse nganha kaniya.
Apan nagmahay matod pa ang suspetsado ug nangayo kini og pasaylo apan makita sa nawong niini nga wala’y emosyon ug blanko. Ang nurse dunay duha ka nabiyaang mga anak nga nag-edad og 16 anyos ug 10 anyos.
“Fatal kay liog murag naay duha ka samad sa liog and then naay samad sa dughan diri sa chest gyud then naa pud sa bukton ug kamot siguro katong sa bukton ug kamot mga defense wounds,” sigon ni Police Lieutenant Colonel John Kareen Escober, hepe sa Tagbilaran City Police Station. (RTB / Kahlil Lester O. Camba)
