TALIWA sa pagdaghan sa mga nakit-ang cobra kasagaran banakon sa Bohol, gipasalig sa labaw sa Provincial Health Office (PHO) nga adunay magamit nga pagtambal alang sa mga tawo nga nanginahanglan.
Si Dr. Fruserma “Em-Em” Uy, Officer-In-Charge sa PHO, nibutyag nga adunay anti-venom vaccine ang Governor Celestino Gallares Memorial Medical Center (GCGMMC) alang niadtong mapaakan og bitin labina sa cobra.
Ang pasalig ni Uy iyang giluwatan nunot sa kabalaka sa publiko human gipaak og banakon ang usa ka 3 anyos nga batang babaye sa Barangay Bagacay Cawayan sa lungsod sa Loon niadtong Miyerkules, Oktobre 16 diin namatay gyud kini.
Miingon si Uy nga limitado lang ang anti-venom sa Gallares Medical Center tungod kay limitado lang usab ang supply nga gihatag sa Research for Tropical Medicine sa Department of Health.
Wala usab niini ang mga district hospital ug pribadong tambalanan ingon man mga botika sanglit ang pagbaligya ug pagpalit sa anti-venom gi-regulate. Kinahanglan usab nga gibansay ang mga personnel nga modumala sa tambal.
Ang la o venom sa halas, labina sa cobra, peligro sa kinabuhi o makamatay, kon dili dayon matambalan.
Busa, matud ni Dr. Em-Em Uy, importante kaayo nga madala dayon sa ospital nga dunay anti-venom ang tawo nga mapakaan og halas labina ang cobra.
Ang publiko gitambagan usab nga magmatngon kanunay labina sa kasagbotan ug ubang mabugnaw nga dapit nga paboritong puy-an sa mga halas.
Kahinumdoman nga subay sa strategic roadmap sa administrasyong Aumentado usa ang kahimsog sa panglawas sa gitutokan niini tungod kay gilantaw nga kauban sa paglambo sa ekonomiya sa lalawigan sa Bohol ang himsog nga katilingban sa lalawigan sa bohol.
Gisiguro usab ang kaluwasan sa publiko labi na kung ugaling dunay mga emerhensiya nga dali kining ma respondehan ug madapatan sa insaktong tambal. (RTB)
