NIDUSO na sa ilang mga kandidatura ang Uswag Tagbilaranon nga gipangunahan ni standard-bearer Konsehal ‘A.T.O.Y’ Torralba kinsa molansar pagka mayor ning atong dakbayan uban ni kanhi bise mayor Toto Veloso isip runningmate.
Suma pa sa mga dumadapig sa numbero unong konsehal nga ang pasabot sa ‘A.T.O.Y mao ang ‘Always Thinking Of You’ sanglit sayon ra man siya sampiton ug maka-masa.
Si Konsehal Atoy ang kasamtangang Floor Leader sa Sangguniang Panlungsod ug Chairman sa Committee on Rules, Health and Environment samtang Vice Chairman sa Committee on Youth and Sports.
Iyang runningmate o ka-tandem mao ang Golden Gavel Awardee sa Vice Mayors League of the Philippines nga si kanhi bise mayor Toto Veloso.
Magpa-reelect pagka-konsehal si Ody Glovasa kinsa kanhi kapitan sa Poblacion III ug nahimong Liga ng mga Barangay President ning atong Dakbayan.
Mobalik usab sa konseho si kanhi konsehal Felipe ‘Jonn’ Pamaong Dela Torre Jr. kinsa nangalagad niadtong 2001-2004 ug usa ka Certified Public Accountant ug gradwado sa abogasya.
Mga CPA usab sila Gerardo ‘Doydoy’ Madanguit ug Joseph Revil Cacho. Si Madanguit ang tag-iya sa Panglao Gold Sports and Entertaintment Park didto sa Panglao ug nahimong Acting Chief of Division (General Accounts and Financial Analysis Division sa Central Bank of the Philippines.
Sa laing bahin, si Cacho usa ka kanhi congressional consultant ug kasamtangang Chief Operations Officer sa Park ‘N Go sa Mindanao area.
Si Joseph ‘Lamjo’ Lamdagan usa ka Registered Nurse ug Safety Officer kon diin pipila ka nasud na ang iyang na-trabahoan. Usa ka registered nurse usab si Juliet Salinas ug Barangay Kagawad sa Cogon.
Apil usab sa Uswag Tagbilaranon si Poblacion 2 numero 1 nga councilor Elmer Dano Taldo, usa ka Mass Communications graduate ug kasamtangang Provincial Coordinator sa SAGIP Partylist.
Ang naila sa mga civic ug cause-oriented groups nga si Rey Tirol wala hingkalimti. Usa siya ka Civil Engineer, Architect, Law ug MBA graduate.
Kanhi Division Superintendent DEPED Dumaguete City si Marina Sarabia Salamanca ug trial lawyer ang batan-on nga si Atty. Gio Edrose Reformina nga partner sa Anino, Reformina, Balite-Anino law Office. (Kahlil Lester O. Camba)
