NAKADAWAT sa sertipikasyon ang panggamhanan sa lalawigan sa Bohol human nagtakda og bag-ong sumbanan alang sa pagka-inclusivity, ug pag-angkon sa prestihiyosong Mother-Friendly Workplace Certification (MFWC) gikan sa Department of Health (DOH), nga gipasalig sa pagsuporta sa mga nagtrabaho nga mga inahan.
Ang Lactation Station sa Kapitolyo nakadawat og sertipikasyon gikan sa DOH Region 7, giila nga Mother-Friendly Workplace, nga gikumpirma ni Machiavillia Luida Caliao, Provincial Maternal, Newborn, and Child Health and Nutrition Nurse Coordinator.
Ang sertipiko gi-isyu niadtong Septiyembre 11 ug gipirmahan ni Regional Director Dr. Jaime Bernadas, nga adunay duha ka tuig nga balido, ug ubos sa re-application ug reassessment.
Kining mahinungdanon nga kalampusan nagtimaan sa ikatulo nga non-health facility sa Bohol nga nakadawat og pag-ila sa mga breastfeeding room niini nga ma-access sa una ug bugtong UNESCO Global Geopark ug Regenerative Province sa Pilipinas.
Niadtong Septembre sa miaging tuig, giablihan sa Kapitolyo ang Lactation Station, nga nahimutang tupad sa Provincial Health Office, nga gitumong sa paghatod sa inklusibo ug accessible nga serbisyo sa panglawas sumala sa prayoridad sa Strategic Change Agenda ni Gov. Aris Aumentado.
Dugang pa, ang pag-ila nagsugod sa Bohol-Panglao International Airport, nga nakakuha og sertipikasyon niadtong Abril 11 ning tuiga sa ilang breastfeeding station.
Ang Munisipyo sa Loboc nahimong labing unang local government unit sa Bohol nga nahatagan sa certification nga gi-isyu niadtong Marso 15, uban sa ilang Breastfeeding Station sa Heritage Building sa Loboc Tourism Complex.
Kini nga pag-ila subay sa Republic Act No. 10028, nailhan nga Expanded Breastfeeding Promotion Act, nga nagmando sa tanang publiko ug pribadong institusyon nga magtukod ug lactation stations.
Sa wala pa ang certification, ang mga pasilidad nakahimo sa self-assessment tool ug gisumite kini uban sa ilang letter of intent ngadto sa ilang tagsa-tagsa ka local government unit (LGU) o sa local health department.
Ang LGU nagsusi, nag-assess sa mga aplikasyon, ug nagpadala og mga rekomendasyon alang sa mga sertipikasyon ngadto sa DOH Regional Office, nga nagsusi ug nagpahigayon og random validation.
Mga pasilidad nga nahiuyon sa implementing guidelines ug mga kinahanglanon sumala sa DOH Department Order 0365 series of 2011, lakip ang workplace policy, lactation stations ug periods, compliance sa milk code, breastfeeding information, ug uban pang feature sama sa monitoring.
Alang sa mga pasilidad nga dili kuwalipikado, ang DOH moduso og report ngadto sa aplikante sa mga rason nganong dili mahatag ang sertipikasyon. (RTB)
