MISALMOT ang Kapitolyo nga girepresentahan ni Executive Assistant Romeo S. Teruel, uban sa mga personahe sa Bohol Provincial Tourism Office (BPTO) – Gina Peluchi Kapirig ug Jhona Villar Bernadez, sa Alignment and Harmonization sa lainlaing mga balaod ug regulasyon workshop sa Panda Tea Garden Suites.
Ang workshop nagtuyok sa paghisgot sa mga isyu mahitungod sa Panglao Island Protected Seascape (PIPS) ug sa mga komunidad sulod sa local government units (LGUs) sa duha ka lungsod sa Dauis ug Panglao.
Ang kalihokan gisugdan pinaagi sa welcome message gikan ni Jose Cleo Cary Colis sa Provincial Environment and Natural Resources (PENRO)-Department of Environment and Natural Resources (DENR).
Sa iyang mensahe, iyang gihisgutan nga ang katuyoan sa kalihokan mao ang pagpasiugda sa malungtarong turismo, nga gikonsiderar ang tanan nga mga isyu nga giatubang sa gipanalipdan nga talan-awon sa Panglao Island, lakip na ang mainland ug uban pang mga destinasyon sa turista dinhi.
Atol sa workshop, ang mga partisipante ug ang mamumulong, si Charlie E. Fabre, Assistant Regional Director sa DENR-VII, naghisgot sa mosunod nga mga isyu: environmental ug conservation concerns, mga kakulangan sa turismo nga imprastraktura, institutional ug operational gaps, regulatory and compliance violations ingon man ang sosyal ug mga epekto sa komunidad.
Dugang pa, gipahinumdoman ni Teruel ug Kapirig ang mga partisipanteng ahensya nga kung hisgutan ang mga kakulangan sa imprastraktura, hinungdanon nga magtukod mga standard nga imprastraktura ug mailhan kung unsa ang dili bahin sa protektadong lugar.
Ang pag-align ug pag-harmonya sa kasamtangang mga balaod ug ordinansa gikan sa mga responsableng ahensya gihimo aron mas mailhan ang mga gikinahanglang aksyon nga himoon ug matino kung unsaon epektibong pagsulbad sa mga problema nga nakaapekto sa LGUs ug uban pang hingtungdan nga organisasyon.
Matod ni Glicerita Racho, ang Officer in Charge sa CENRO, ang mga balaod sa kinaiyahan nga gipatuman sa DENR nagtutok sa pagkonserbar, pagpanalipod, pagdumala, ug hustong paggamit sa kinaiyahan sa nasod sa paagi nga magamit ang malungtarong pagdumala.
Gihisgutan niya kini sa usa ka dali nga pakighinabi bahin sa epekto sa kalihokan sa kalikopan sa Bohol isip ang una ug bugtong UNESCO Geopark sa nasud.
Ang maong kalihukan gitambungan sa nagkalain-laing ahensya ug organisasyon, lakip ang Department of Tourism (DOT) VII, Provincial Environmental Management Unit (PEMU) – Bohol, Environmental Management Bureau (EMB) VII, Department of the Interior and Local Government (DILG) Bohol, ug mga opisyal gikan sa LGU Dauis ug Panglao.
Ang Panggamhanan sa Lalawigan, ubos sa pagpangulo ni Gobernador Erico Aristotle Aumentado ug Bise Gobernador Tita Baja, nagpasiugda sa pagkamalahutayon sa kalikopan sa iyang estratehikong gambalay sa pagdumala, nga nahiuyon sa pagtudlo sa probinsiya isip una ug bugtong Global Geopark ug isip usa ka aspiring regenerative island sa nasud. (RTB)
