MOABOT sa 29 ka mga barangay ang nadugang sa listahan nga nahimong drug-cleared barangays sa rehiyon human sa gihimong proseso ug deliberasyon nga gilusad sa Regional Oversight Committee on Barangay Drug Clearing (ROCBDC) sa buhatan sa Philippine Drug Enforcement Agency (PRO) 7 niadtong Miyerkules, Septiyembre 25, 2024.
Sa maong gidaghanon, 15 niini gikan sa Bohol, 6 sa Negros Oriental, 5 sa Sugbo ug 3 gikan sa urbanized cities nga mao ang Ibo ug Talima sa Lapu-Lapu ug Pagsabungan sa Mandaue.
Ang pagdeklarar sa maong mga barangay nga drug-cleared nagpasabot nga atol sa ilang application tanang drug personalities nailhan sa komunidad ug naihap nila kini samtang dunay gihimong intervention program ang mga opisyal sa barangay nga gipatuman sama sa community-based drug rehabilitation programs (CBDRP) niadtong mga tawo nga tig gamitan sa illegal nga drugas.
Ang proseso sa deliberasyon gipangunahan sa PDEA 7 Regional Director Emerson Margate nga mao usab ang Chairman sa komitiba.
Ang ubang sakop sa komitiba nga misalmot mao ang chief Local Government Monitoring and Evaluation Division (LGMED) sa Department of Local Government Unit 7 Celerino Magto Jr. isip committee vice chairperson, Police Regional Office (PRO) 7 ug ubang representatives gikan sa lainlaing local government units sa online deliberation.
Atol sa maong kalihukan 51 nga drug cleared ug 6 nga drug free barangays sa probinsya sa Siquijor ug ang drug free sa Lapu-Lapu nga mao ang Cawhagan sa isla sa Olango nagpabilin ang ilang status.
Mipasabot ang PDEA 7 nga ang padayon nga pagpatuman sa anti-illegal drug program sa mga drug cleared ug drug free barangays lakip na niini ang anti-illegal drug operations giisip nga critical nga bahin sa Barangay Drug Clearing Program.
Gipasalig nila nga kung dunay bag-ong motumaw nga drug personalities sa mga drug cleared ug drug free nga mga barangay andam sila nga sulosyonan. (RTB)
