GIPAHIGAYON dinhi sa Bohol, ang una ug bugtong UNESCO Global Geopark ug ang Regenerative Island Province, ang 2024 Rabies Summit sa Department of Health (DOH) Region 7 nga gipahigayon sa Solea Coast Resort, Panglao, gikan sa Septiyembre 17-20, 2024.
Ang upat ka adlaw nga kalihokan nagtumong sa pagrepaso sa program implementation and planning workshop sa National Rabies Prevention and Control Program (NRCPP), nga gitambongan sa 77 ka program coordinators sa Central Visayas Region.
Si Jonathan Neil Erasmo, Hepe sa Local Health Support Division sa DOH 7 Center for Health Development (CHD), miabi-abi sa mga partisipante nga gisundan ni Dr. Bayo Fatunbi, Technical Officer gikan sa World Health Organization (WHO), nga nagpatin-aw sa papel sa institusyon sa NRPCP.
Samtang si Alexander Taruc, WHO Neglected Tropical Diseases (NTD), Consultant, mihatag ug updates sa NRPCP diin sa samang higayon, si Dr. Ronald Jarvik Buscato, Medical Officer IV sa DOH 7 CHD, mipresentar sa guidelines sa rabies ug animal bite management.
Gituki usab ni Senior Program Health Officer Jaika Jel Besira sa DOH 7 CHD ang kahimtang sa rehiyon sa Animal Bite Treatment Centers (ABTCs) ug Animal Bite Clinics (ABCs).
Sa usa ka dali nga pakighinabi atol sa pagbukas sa kalihokan, gipaambit ni Besira ang kinatibuk-ang tumong sa summit, ilabi na sa pagpahapsay sa mga proseso sa programa.
“Ang atong tumong mao ang pag-apil niadtong mga LGUs (local government units) nga walay kaugalingong ABTC pinaagi sa zoning, pagpaayo sa referral system sa mga pasyente nga adunay pinaakan sa hayop, ug (usab) pagbakuna,” padayag ni Besira.
Sa ikaduhang adlaw, si Dr. Orfel June Calunsag, Veterinarian II sa Department of Agriculture 7, mihatag ug update sa animal rabies initiatives nga gisundan sa presentasyon sa PhilHealth Benefit Package for Animal Bites.
Si Dr. Charin Thawornkuno sa Department of Molecular Tropical Medicine and Genetics, Faculty of Tropical Medicine sa Mahidol University mipaambit sa usa ka diskusyon nga giulohan og promising anti-rabies lgY Immunoglobulin.
Sila usab si Hope Desiree Lapasaran, ug Kenneth Canales, Nurse II sa DOH 7 CHD, mipresentar sa mga topiko sa standard forms ug rabies death investigation, matag usa.
Samtang, natapos ang ikaduhang adlaw diin ang matag provincial rabies coordinator mipresentar sa ilang provincial rabies programs, uban sa mga presenter nga naglakip nila ni Glinnie Ricamor, Siquijor; Ariel Mendez, Negros Oriental; Dominic Tagnipez, Cebu; ug Polizena Rances, Bohol.
Sa Septiyembre 19, ang mga partisipante miapil sa planning workshop ug presentasyon sa best practices sa ABTC sa matag probinsya, ABTC flow of services sa highly-urbanized nga mga siyudad sama sa Lapu-Lapu ug Mandaue, ug workshop outputs.
Sa kataposang adlaw sa rehiyonal nga summit, ang mga partisipante mipresentar sa Regional Action Plan, miapil sa usa ka bukas nga forum, ug nagpahigayon og mga ebalwasyon base sa co-created workshop outputs ug shared best practices sa NRPCP.
Ang rabies, usa ka viral nga sakit nga makaapekto sa sentral nga sistema sa nerbiyos, kasagaran nga mapasa pinaagi sa laway sa nataptan nga mga hayop, kasagaran pinaagi sa mga pinaakan.
Sa report gikan sa Provincial Health Office (PHO) niadtong Hulyo 2023, nisaka ang kaso sa rabies ug nangamatay, nga adunay 5,880 ka kaso ug pito ang namatay.
Ang Bohol adunay kinatibuk-an nga 15 ka ABTC ug ABC diin ang mga Boholano makadawat og saktong pagpanglimpyo ug post-exposure prophylaxis (PEP) nga mga bakuna aron malikayan ang impeksyon sa rabies.
Uban sa taho gikan sa PHO, si Gobernador Erico Aristotle Aumentado nipagawas ug memorandum sa miaging tuig aron palig-onon ang responsableng pagpanag-iya sa mga binuhi aron makunhuran ang gidaghanon sa mga saag nga iro-related nga aksidente sa kadalanan ug mga kaso sa pagpaak sa mananap isip kabahin sa Strategic Change Agenda sa kaluwasan ug kaayohan sa mga Boholano. (RTB)
