NANUMPA na kagahapon ang bag-ong napili nga mga opisyal sa BIT-International College Federated Parents & Teachers Association (FPTA) nga gihimo sa JJ’s Seafoods & Restaurant ning syudad.
Si Tagbilaran City Mayor Jane C. Yap maoy inducting officer sa grupo kinsa miingon nga sulod sa iyang termino isip mayor, labing una kini nga higayon nga iyang gihimo sa tanang FPTA sa syudad sa Tagbilaran mao nga bisan kon dunay kadungan nga trahediya (sunog), iya gyud nga gibisita ang kalihukan.
Ang mga nanumpa atubangan ni Mayor Yap mao sila si Roger Balamad-President; Charlie Pernia-V-Pres; Juvie Patac-Sec; Junalyn Bersamina-Treas; Maria Cinesa Alpes- Auditor; PIO’s- Anna Mirasol Duterte (Elem), Josephine Maninantan (JHS), Mark Ryan Pernia (Gr. XI), Mirasol Lugnasin (Gr.XII); Peace & Order Officers- Analyn Rara (Elem), Edwin Oliver Pilota (JHS), Glenaldo Suico (Gr. XI), Junnel Palomares (Gr. XII) ug mga sakop sa BOD.
Gibutyag ni Yap nga ang mga Balite mao lang ang bugtong nanag-iya ug tunghaan sa Bohol nga naghatag higayon sa mga ‘less fortunate students’ nga makatapos sa ilang gitinguhang kurso tungod sa paghatag sa nauwahi sa mga scholarship program.
Gipasalig usab ni Yap ang padayong pakig-alyansa sa syudad sa Tagbilaran sa BIT-International College ug gani nasugdan kini panahon sa Pandemic nga ang City Government ubos sa iyang pamunuan mihatag sa libre nga ‘first aid training’ sa tanang mga kabataan.
Andam usab nga muhatag sa bisan unsa nga tabang si Yap sa FPTA ilabi na nga sood ug kumpare niini ang pangulo nga si Mr. Roger Balamad.
Sa susamang kalambuan, si Atty. Salvador Diputado nga Director sa BIT-IC Main Campus mao ang mirepresentar sa tag-iya sa tunghaan nga si Atty. Dionisio Balite kinsa dunay importanting lakaw ang nauwahi.
Gipasalig ni Atty. Diputado nga sa habig sa management andam silang maminaw sa suhistiyon sa mga ginikanan ug suportado nila ang mga plano sa kapunungan.
Samtang gibutyag usab sa pangulo sa FPTA Roger Balamad nga ang proyekto sa kapunungan karon nga tuig tingklase (2024-2025) mao ang pagbutang ug mga emergency lights ug wall TV sa tanang lawak saringan sa elementarya ug high school.
Gipasalamatam usab ni Balamad ang tanang stakeholders ug gihagit ang kaubang mga opisyal nga dili magmika sa ilang katungdanan kay ang gilantaw sa kapunungan kaayuhan man sa mga kabataan niini. (RTB)
