SUBSOB na ang pagpangandam sa Police Regional Office-7 alang sa filing sa certificate of candidacy karong Martes, Oktubre 1, 2024 sa umaabot nga midterm elections sa sunod tuig.
Si Police Lieutenant Colonel Gerard Ace Pelare, tigpamaba sa PRO-7 nagkanayon nga ang mga buhatan sa Commission on Election (COMELEC) sa Rehiyon-7 bantayan og PNP personnel.
Apil usab sa hatagan og seguridad ang rota paingon sa mga opisina.
Gikinahanglan nga andam ang kapolisan gumikan kay ilang gipanglantawan nga gawas sa mga kandidto nga moadto sa mga buhatan sa COMELEC apil usab sa modugok ang ilang mga supporter.
Nasayran nga nagtagbo ang kapolisan ug kasundalohan sa niaging adlaw alang sa joint security command conference.
Adunay kamandoan usab si Police Brigadier General Anthony Aberin, direktor sa PRO-7 nga mohimo og threat assessment sa mga elected official ang mga city ug provincial director.
Matud ni Pelare nga anaa nay gihimong proactive threat assessment ang kapolisan sa Central Visayas diin ipadayon nila kini tungod kay anha pa masayran inig filing sa COC kinsa ang mga modagan ingon man ang adunay hulga sa kinabuhi.
Gisusi usab sa PRO-7 ang mga posibleng areas of concern base sa ihatag nga parameter sa COMELEC sa sunod nga joint security meeting.
Gisubay sa PRO-7 ang ilang records sa mga lugar nga gideklara nga areas of concern, areas of immediate concern ug Comelec control.
Hatagan usab nila og pagtagad ang Probinsiya sa Negros Oriental gumikan sa nahitabo sa niaging tuig nga adunay mga kinabuhi nga nakalas.
Apan giklaro ni Pelare nga malinawon na karon ang Negros Oriental ug dili na sama kaniadto. (RTB)
