USA ka partilistang grupo ang nikampanya karon batok sa mga kandidatong gihulagway nila nga dili tiunay ang tinguhang matabangan ang katawhan kondili ang pagpadato samtang naa sila sa posisyon.
Ang ALIF o Ang Laban ng Indiginong Filipino partylist pinaagi sa ilang First Nominee Rogelio Villangca nanawagan sa katawhan nga dili botaran ang mga politikong kurakot aron makab-ot ang tinud-anay nga kausaban ug sensirong serbisyo para sa katawhan.
“Walay katungod ug ayaw botari ang mga nikandidato nga ang interest mao lang ang magpadato tungod kay ang sinsirong pagpanerbisyo, nagpasabot ug pagtabang sa panginahanglan sa kabus nga katawhan,”matud pang Villangca.
Matud pa ni Villangca nga daghan karong nanagan sa lokal ug bisan sa nasudnong posisyon ang nalambigit sa kurapsyon kaniadto.
Nagtuo siya nga kun sila mobalik sa gahum dili gihapon makab-ot ang tiunay nga kausaban ug serbisyo para sa tanan ilabi na sa mga Indigenous People sa nasud.
Usa sa adbokasiya sa ALIF ang pagtabang sa katawhan nga makabaton og trabaho, edukasyon, health care, para sa mga kabataang kabus ilabi na kadtong naa sa mga hilit nga dapit aron mahatagan og kahayag ilang ugma.
Samtang gihimug-atan usab ni ALIF 2nd Nominee Mae Bautista Ferro ang makaluluoy nga kahimtang sa mga IP o mga lumad tungod napasagdan sila sa gobiyerno.
Sumala pa niya, dili man tuod madali nga masolusyonan kining tanan apan angayang tun-an og maayo kun unsaon sila pagtabang.
Dugang pa ni Ferro nga gikinahanglang dunay himuong kausaban sa mga balaud ug kinahanglang maapil ang mga lumad aron sila maatiman ug makatagamtam sa serbisyo sa gobiyerno dungan sab sa pagpreserbar sa ilang kultura, kustombre ug pamaagi sa kinabuhi.
Ang maong partilista padayon karon nga nakigalayon sa mga lokal nga mga kandidato sa nagkadaiyang rehiyon sa nasud aron mapalapdan pa ang ilang adbokasiya pagtabang sa mga kabus ug IPs. (RTB)
