MIHIMO ang katawhan sa Balilihan kaniadtong Biyernes, Abril 8, 2022 sa usa ka ‘people power protest’ aron mahuman na ang proyekto sa panubig sa ilang lungsod.
Gibutyag ni Balilihan mayor Pureza Veloso Chatto nga ang katawhan sa ilang lungsod nagpahigayon og peaceful rally aron hingpit nang mahuman ang proyekto.
Si Mayor Chatto nga maoy nangulo sa kalihokan kauban ang iyang anak nga si Atty. Trisha Chatto miingon nga ang katawhan sa 31 ka barangay sa Balilihan pinangulohan sa ilang mga kapitan miapil sa malinawong rally sa Bugwak Spring sa barangay Santo Nino aron pagpakita og suporta alang sa kahumanan sa maong proyekto sa panubig sa lungsod.
Matod ni Chatto nga ang Balilihan Centralized Bulk Water Supply maka supply og tubig sa tanang 31 ka mga barangay sa lungsod ug kini naa na sa tumoy-tumoy sa kahumanan, ang kulang na lang ang pagpahiluna sa generator set ug sa panel board apan sila nasubo kay gibabagan sa pribadong investor nga Richli Water Corp. ang pagsulod sa mga gamitong ekipo kay matod pa “trespassing” sa ilang pribado nga propiedad. Kini maoy hinungdan nga mihimo og malinawong rally ang katawan.
Gitin-aw sa mayor nga base sa cadastral survey ug survey sa Department of Environment and Natural Resources (DENR), kini nga agi-anan nga gibabagan sa pribadong investor usa ka ‘legal easement’ nga libre nga agi-an sa mga tawo, mga sakyanan ug uban pa padung sa suba.
Wala na gipugos sa local government unit (LGU) pagpasulod ang genset ug gikutayan lang kini og linya sa contractor ngadto sa makina aron maka testing na og suyop ug pag-supply og tubig ngadto sa mga transmission pipes ug reservoir.
Sa pagsuwat ning balita kagabie, wala pay giluwatan nga pamahayag ang habig sa Richli Water isip reaksyon sa kalihokan nga gihimo sa katawhan sa maong lungsod. (RTB)
