GIBIDA ni Department of Education Undersecretary Trygve Olaivar ang mga natabang ni kanhi Senador ug karon Education Secretary Juan Edgardo” Sonny” Angara sa lungsod sa Ubay atol sa pagsaulog sa ika-177 nga kasumaran sa pagkahimugso sa lungsod niadtong Domingo.
Ang Bol-anong DepEd Usec. maoy pinasidunggang dinapit ug mamumulong sa founding anniversary sa Ubay nga gipangulohan ni Mayor Constan Reyes sa Ubay gymnasium.
Ang mensahe ni Olaivar nakasentro sa gugma, panaghiusa og pagtinabangay sa katawhan nga maoy yawe aron makab-ot ang mga kalamboan.
“It shows that when we work hand in hand, with a shared vision and purpose, we can achieve remarkable things for our community. As we honor our past and look to the future, let’s commit to upholding these values- service, love, unity, and cooperation- and to keep them burning brightly in your hearts. Together we will continue to build a brighter, more prosperous Ubay.” siya miingon.
Gipaambit ni Olaivar ang gisang-at nga balaudnon ni kalihim Angara sa dihang senador pa kini nga mao ang Senate Bill 1837 nga nagtinguha sa paghimo sa Ubay sa usa ka component city nga tawgon og Science City of Ubay.
Gipahibalo usab niini ang mga proyektong napondohan ni Angara nga naglakip na sa pagsemento sa mga barangay road sa barangay Gabi, Barangay Hambabawran, Brgy. California, Brgy Katarungan nga parehong kantidad og P5 million matag usa, pagtukod og water system level III kantidad og P5 million sa Brgy Lomangog, pagsemento sa kalsada sa sitio kabulakan, Brgy Lomangog sa kantidad nga P12 million, paggama og kalsada gikan sa Imelda hangtod sa Brgy Union kantidad og P10 million, P30 million nga concreting sa kalsada sa Brgy Poblacion, pagpaayo sa Don Emilio del Valle Memorial Hospital ug uban pa.
“These projects are testament to the commitment of our leaders to ensure that Ubay continues to grow and thrive.” ang Usec. miingon.
Si Usec Trygve, bana ni Candijay Mayor Thamar Olaivar, kinsa miduyog sa selebrasyon miingon nga ang maong mga proyekto maoy pamatuod sa dedikasyon ug committment sa mga lideres sa pagsiguro ang Ubay padayong molambo.
“With this initiative, we are not just building infrastructure, but we are building opportunities- opportunities for employment, business, and for improving the quality of life of every Ubayanon.” siya nidugang.
Mitambong ug mihatag usab og kamabulokon sa okasyon si Gobernador Aris Aumentado kinsa nagpasalamat usab kang Angara ug Olaivar sa dakong natabang niini sa Bohol.
Samtang, nagpasalamat si Mayor Constan Reyes kang Olaivar ug Angara sa mga tabang para sa ilang lungsod. (rvo/rt)
