LAING mga barangay usab ang nakadawat sa pinansyal nga ayuda niadtong Septyembre 3, og gihatod kini sa mga Executive Assistants (EA) ni Gobernador Aris Aumentado.
Ang mga Executive Assistants (EA) nga si Pableo Sumampong ug Stephen Rances mao ang iyang gipadala ug gipahatod sa mga ayudang pinansyal gikan sa Kagamhanang Probinsiyal gumikan kay nangandam ang Gobernador alang sa iyang byahe pagtambong sa Regional Development Council (RDC) 3rd Full Council Meeting sa Sugbu.
Si Kapitan Dexter M. Curayag sa Barangay Anislag, Corella, midawat sa tseke nga nagkantidad og P200,000 alang sa pagpabuhat og mga public comfort rooms sa barangay.
Samtang sa laing bahin, si EA Sumampong uban kang First District Board Member Lucille Lagunay mao ang mitambong sa ngalan sa Gobernador, ngadto sa ika-140 nga Foundation Day sa lungsod sa Corella.
Mainiton nga gi-abiabi ni Corella Mayor Juan Manuel “Manju” Lim ug sa ubang mga opisyales sa lungsod ang ilang mga bisita gikan sa Kapitolyo.
Gipahigayon ang ceremonial turn-over sa mga ayuda ug sand and gravel share atol sa kalihukan sa Corella.
Si Executive Assistant Pableo Sumampong kinsa maoy gipadala usab sa Gobernador sa Corella, sa iyang mensahe atol sa Corella Foundation Day, mipahibalo sa katawhan nga dako ang umento sa koleksyon sa income bahin sa sand and gravel sukad sa administrasyon ni Aumentado gumikan sa makusganon niini nga kampanya batok korapsyon ug ang abot niini derecho sa panudlanang probinsyal, diin ang mga bahin sa munisipalidad ug barangay personal usab nga ginahatod sa Gobernador ngadto sa mga resipyente.
Si Sumampong nagkanayon nga sa administrasyon ni Aumentado nawagtang ang anino ni Ivan ug tin-aw kini nga naobserbahan pinaagi sa dako nga kalainan sa koleksyon gikan sa mga lehitimo nga quarry sa administrasyong Abante Bohol.
Matud pa ni Sumampong, sumala sa taho sa Kapitolyo ang income gikan sa tuig 2019 nga P4.149M, sa 2020 nga P13.811M ug sa 2021 nga P8.028M, mitubo kini ngadto sa P16.793Milyon sa tuig 2022, diin mas midako kini sa 2023 ngadto sa P40.16 Milyon.
Sulod sa walo ka bulan ning tuig 2024, gikan sa buwan sa Enero hangtod sa Agosto, nakakolekta ang Panudlang Probinsyal sa kantidad nga P25.955Milyones gikan sa sand and gravel mas duol sa projected collections sa Kapitolyo nga P45milyon ning maong tuig.
Kahinumduman nga si Gobernador Aris Aumentado makusganon nga mikampanya alang sa usa ka limpyong gobyerno.
Sa laing bahin, ang barangay Cancatac nakadawat sa P240,000 nga sand and gravel share gikan sa buwan sa Enero hangtod Marso 2024.
P200,000 usab ang gidawat sa Barangay Pandol alang sa ilang Riprapping Works, samtang ang Barangay Canapnapan, adunay P200,000 para sa pagpatiwas sa ilang covered court ug ang LGU Corella nakadawat sa kantidad P180,000 gikan sa Kapitolyo alang sa ilang bahin sa abot sa sand and gravel.
Gipadangat usab ni Board Member Lucille Lagunay ngadto sa katawhan sa Corella ang hugot nga pagsuporta sa Kagamhanang Probinsyal sa ilang lungsod.
Sa buhatan ni BM Lagunay, ang magbabalaod, regular nga nakapagawas og mga pondo matag tuig isip tubag sa hangyo sa kabarangayan abag alang sa ilang mga proyekto.
Dakung hagit ang makab-ot ang limpyong pang gobyerno sa lalawigan sa Bohol, ilalom sa administrasyon ni Aumentado, gipakusgan niini ang kampanya batok sa korapsyon aron mahatod ngadto sa katawhan ang ilang bahin ug sila ang makapahimos niini pinaagi sa mga proyekto ug mga programa sa ilang kabarangayan. (RTB)
