PORMAL nang gi-proklamar ni ABante Bohol standard bearer Aris Aumentado ang Team Albur, Huwebes sa gabie didto sa WEPO Gym.
Si 2nd district Cong. Aumentado ang moatbang kang Gob.Art Yap sa 2022. Ang iyang runningmate mao si Senior Board Member Dionisio Victor Balite,Ph.D.
Si BM Balite ang moatbang kang Bise Gob. Rene Relampagos.
Niadtong 2016, ang amahan ni BM Balite nga si kanhi Senior BM Dionisio D. Balite,Ph.D gipilde ang kanhiay bise gobernador nga si anhing Conching Lim.
“Full Force” ang Board Member slate sa ABante Bohol nga naglakip nila incumbent BM “Nanay” Lucille Lagunay, Dominic Butalid ug Margaux “Goldie” Herrera-Caya.
Si Lagunay usa ka kanhi konsehal sa Dakbayan sa Tagbilaran samtang si Butalid ang anak ni kanhi Gob. Rolly Butalid.
Si Herrera-Caya, usa ka magpapatigayon ug anak ni kanhi bise gobernador, Atty. Julius Herrera.
Pag-umangkon usab siya ni kanhi senador (+) Ernesto “Boy” Herrera.
Nag-una sa Team Albur slate mao si kanhi mayor ug karon konsehal Elpren Charles “Bobec” Tungol, incumbent Vice Mayor ug molansaray pagka kagawad nga si Alexis Fernan Simeon, Harold Buates, Bahi Brgy. Kagawad Felix Wapano, Oliver Pilota, Rito Duliguez, RR Ombayan ug Dennis Nick Bitoy. (Kahlil Lester O. Camba)
PASANGIL GIHIMAKAK
Nihimakak si kanhi Bise Gobernador, Atty. Dionisio D. Balite,Ph.D atol sa proclamation rally sa Team Albur ang pasangil ni Albur Mayor Don Ritchie Buates .
Kini kabahin kon modaug pagka-mayor si Kagawad Ritchel Lim , ang kwarta sa panudlanan sa Lokal nga Pangagamhanan sa lungsod dalhon sa BIT alang sa scholarhip programs.
Si Atty. Balite ang Chairman Emiritus sa maong tunghaan nga dugay nang naghatag ug nagtabang sa mga Alburanon nga gusto makahuman sa pag skwela.
Dugang pa niya nga siya mismo uban si Kag. Lim maoy nagkuyog kanunay sa ilang kaumahan alang sa “food security” sa ilang ginsakopan.
Nakapanghatag usab ang ilang banay sa mga relief packs sa mga Alburanon nga walay pili-pili human sa bagyong Odette.
Kahinumduman nga ang Albur maoy usa sa mga lungsod nga gilaomang init ang politika karong 2022.
Ikaatbang ni Kagawad Lim si incumbent Albur Mayor Don Ritchie Buates. Runningmate ni Lim mao ang iyang kauban sa Sangguniang Bayan nga si Kagawad DanDan Samar.
Usa sa mga programa ni Samar mao ang “ From Womb to Tomb” nga usa sa mga nakapalig-on niya isip usa ka politiko.
Sa laing bahin, ang molansar pagka bise mayor kauban ni Buates mao si kanhi bise mayor Jet Jose Ugdoracion.
Suma pa sa mga tigpaniid sa politika, nagkakusog ang Team Albur gumikan kay alyansa man kini sa mga prominenteng pamilya sa maong lungsod sama sa mga Tungol, Simeon, Samar ug Lim. (Kahlil Lester O. Camba)
