GITINGUHANG masugdan na ang paggama sa usa ka bag-ong dalan nga musumpay sa mga lungsod sa San Miguel ug Dagohoy, Bohol human gipahigayon ang usa ka ground breaking ceremony niadtong Abril 1, 2022.
Ang mao nga proyekto, nga nagkantidad ug Php40,000,000 ug kinuha gikan sa General Appropriations Act alang sa tuig 2022, gilaraw nga makamugna og usa ka mas mubo nga ruta tali sa Barangay Mahayag sa San Miguel ngadto sa Barangay Babag sa Dagohoy pinaagi sa konstruksyon sa usa ka 2-lane nga kalsada.
Gidahom nga ang maong proyektuha makatabang sa pagpalambo sa ekonomiya sa maagian niining maong dalan tungod sa mas paspas nga paghatod sa mga butang ug tawo.
Ang ground breaking ceremony gitambungan sa mga opisyales sa Department of Public Works and Highways (DPWH), ug gikan sa parehong municipal ug barangay LGUs.
Sa iyang bahin, nipamahayag si Kongresista Erico Aristotle “Aris” Aumentado sa Segundo Distrito sa Bohol sa iyang kalipay kabahin sa mao nga proyekto, nga i-implemetar sa DPWH.
“Kalipay nako nga makit-an ang akong mga isig ka-Bol-anon, ilabi na ang mga lumulupyo sa San Miguel ug Dagohoy, nga makabenepisyo sa kaharuhay nga mahatag niining maong dalan ngadto kanila. Nanghinaot ako nga kini magdala pa ug mas daghang kalambuan sa mga lugar nga serbisyuhan ning maong kalsada,” pamahayag pa sa mambabalaod. (PR/jja)
