NAGKADUOL na ang pangandoy sa mga sakop sa tribu Eskaya nga makaangkon og kaugalingong panimalay nga hatag sa kagamhanan pinaagi sa National Housing Authority (NHA).
Kini human gikaduso na sa National Commission on Indigenous Peoples (NCIP) ang pagtugot nga gikinahanglan aron mahimo na sa NHA nga maghatag og pundo pabalay sa mga Eskaya, subay usab sa gimandu sa balaod.
Kini gikompirmar sa NCIP pinaagi sa officer-In-Charge niini sa Bohol nga si Emmylou Gonzaga.
Ang mga Eskaya, usa sa mga tribu nga gipanalipdan sa balaod nga nagpadayon pang nanimuyo dinhi sa Bohol, ug sila makit-an sa mga kabukiran sa Taytay Duero, Biabas Guindulman, Lundag Pilar, ug Cantaub Sierra Bullones.
Ang Indigenous People’s Rights Act (IPRA) maoy balaod nga gipanday aron kapanalipdan ug gawasnong mapatunhay ang kinaiya, kapanulundan ug gawi sa mga tribu.
Subay sa IPRA, ang tanan nga ahensya nga mosulod sa mga lugar sa mga tribu, kinahanglang makakuha sa sertipikasyon nga nagpamatuod nga nasayud ang tribu, ug nga gibantayan ang pagsulod sa tabang sa ahensya pinaagi sa NCIP.
Sa Section 59 sa Republic Act No. 8371, (IPRA) nagbutyag nga ang tanan nga departmentosug ahensya sa goberno gimanduan sa pagkuha una sa sertipikasyon gikan sa NCIP sa dili pa kini mosulod ngadto, aron maseguro nga mapanalipdan ang katungod sa mga tribu ug ang kayutaan nga ilang giangkon.
Kini nga hangyo sa sertipikasyon, sundan sa pagtuon ug imbestigasyon sa NCIP pinaagi sa iyang Ancestral Domains Office aron mapaabut sa mga katribu ang laraw sa tabang ug aron makahatag silag pagtugot.
Kahinumduman nga makahatag ang NHA og pundo pabalay sa mga 40 ka sakop sa Eskaya nga nanimuyo sa Taytay Duero.
Niini, ang NHA, pinaagi ni Grace Solis nga hepe sa Bohol Field Office mipadayag sa mga Eskaya sa Housing Assistance Program for Indigenous Peoples (HAPIP) nga programa sa NHA, subay usab sa NHA Memorandum Circular No. 2423, nga naghatag sa giya alang sa pagpatuman sa HAPIP.
Ang HAPIP gimugna aron makahatag ang kagamhanan sa kahigayunan sa pagpabalay sa kababayen-an, kalalakinhan, kabataan nga sakop sa mga tribu, aron maugmad ang ilang kahimtang ig pagpakabuhi dala sa hamugaway nga puy-anan subay sa mandu sa IPRA.
Giandam na sa NHA ang P15 milyones nga tabang pinansyal ngadto sa lungsod sa Duero, alang sa proyekto sa resettlement sa mga sakop sa Eskaya.
Kini maoy unang pagpagawas sap undo alang sa pagpahiluna sa yuta ug inisyal nga mga lakang sa pagpatukod sa 40 ka mga mga kabalayan alang sa tribu. (RAHC/PIA7 Bohol)
