KAPIN sa 3,000 ka mga residente ang maka benepisyo sa bag-ong water desalination system nga gibuksan sa islang barangay sa Guindacpan lungsod sa Talibon.
12.7 milyones pesos ang pondo alang sa Potable Water System Powered Desalination ubos sa joint project sa provincial government sa Bohol, World Bank ug Philippine Rural Development Project (PRDP) sa Department of Agriculture diin daku kini og tabang sa islang barangay sa Guindacpan.
Pormal kini nga giturn-over niadtong Hulyo 8 nga gipangunahan ni 2nd district Congw. Van-van Aumentado, Talibon Mayor Janette Garcia, 2nd district board member Jamie Aumentado-Villamor kauban ang mga opisyales sa barangay.
Matud ni Mayor Garcia nga dako kining tabang sa mga residente sa isla nga dugay nang nagpaabot nga makabaton og mainom nga tubig.
Sa wala pa ang water desalination system, matud ni Garcia, ang mga residente kinahanglan pa nga mopalit og mainom nga tubig gikan sa mainland sa Talibon. Mokabat sa 50 pesos ang matag container sa tubig tungod kay ibiyahe paman kini og bangka.
Sa pagkakaron, anaa lang sa 12 pesos matag container ang baligya nga tubig sa water desalination system. Gikinahanglan usab nga dunay income og dili libre ang serbisyo niini sanglit gikinahanglan man alang sa maintenance.
Matud sa Mayor nga mao kini ang ikaduhang water desalination system nga gitukod sa mga kaislahan sa Talibon. Ang una gitukod didto sa barangay Cataban, Talibon niadtong buwan sa Mayo ning tuiga.
Gawas sa Guindacpan ug Cataban nga gibutangan og water desalination system, matud ni Garcia nga mahimo usab nga makaserbisyo kini sa mga silingang isla nga barangay.
Gibutyag ni Garcia nga wala pay target nga barangay alang sa sunod proyekto apan matud niya nga gipasalig ni Gobernador Aris Aumentado nga mangita pa og pondo aron ipatukod og laing water desalination system sa mga islang barangay.
Ilawom sa administrasyong Aumentado-Balite ug subay sa strategic change agenda gilantaw nga kauban ang mga islang barangay sa pag-abante labi na pag-abot sa panginabuhian ug mga panginahanglanon sa katawhang Bol-anon. (RTB)
