PATAY ang usa ka lalaki tungod kay wana makaginhawa samtang nanglimpyo sa lawom nga atabay sa lungsod sa Carmen samtang ang iyang igsuon nahiagom usab sa samang gidangatan samtang naningkamot sa pagluwas kaniya.
Si Leo Gilrubia, hepe sa Carmen Municipal Disaster Risk Reduction and Management Office (MDRRMO), niingon nga ang magsuong giilang sila si Freddie, 28, ug Franklin Estrosas, 23, parehong residente sa Barangay El Salvador, daling gidala sa tambalanan apan gideklarar nga dead on arrival pag-abot.
Matod ni Gilrubia, nanglimpyo sa nauga nga atabay si Franklin agig pangandam sa ting-ulan dihang kalit siyang nawad-an sa hangin mga alas 8:00 sa buntag.
“Nangayo og tabang tong maguwang kay ang manghod nagpabilin sa ibabaw kay galisod siya og ginhawa unya ni dretso pod og na-og ang manghod, mao silang duha,” ni Gilrubia.
Ang amahan sa managsuon misuway sa pagluwas kanila apan gipugngan siya sa iyang pamilya ug mga silingan.
Pipila sa mga nagpakabana nga mga lungsuranon misulay usab sa pagkanaog sa atabay apan pagkahuman nagduha-duha tungod sa kahadlok nga maghuot ug dilk na makaginhawa.
“Uwahi na sila nanawag namo kay sila ming suway pa og kanaog ug maoy mo tabang unta,” dugang ni Gilrubia.
Nadala sa MDRRO ug kapulisan ang mga magsuon apan ang duha wala na mu-responce sa gihimong CPR (Cardiopulmonary resuscitation).
Samtang, gikompirmar sa mga rescuer ang kakuwang sa hangin sa dapit diin nakit-an ang mga lawas.
Namatikdan ni Gilrubia nga nigamit sila og harness aron daling makasulod-ug paggawas sa atabay. (RTB)
