DUHA ka kanhi armadong sakop sa nabungkag nga Front Committee 3, Central Visayas Regional Party Committee (CVRPC), New People’s Army (NPA), boluntaryong mitahan sa Candijay, Bohol.
Giila ang mga indibidwal nga kanhi regular nga armadong miyembro sa NPA sa Squad 2, FC3, CVRPC, NPSRL.
Ang maong operasyon gipangulohan ni PLT Jhon Rey B. Olid sa PMFC, ubos sa direktang pagdumala ni PLTCOL Mark Gifter T. Sucalit, Force Commander sa Bohol Provincial Mobile Force Company.
Ang suporta sa intelligence gihatag sa Provincial Intelligence Unit, BPPO nga gipangulohan ni PLT Dunhill M Sarmiento, ubos sa paggiya ni PLTCOL Joemar Sabellano Pomarejos. Nalambigit usab sa operasyon ang Candijay Municipal Police Station (MPS) nga gipangulohan ni PCAPT Albert R Sator, ang Regional Intelligence Unit 7 (RIU7)- Bohol PIT, ang 47th Infantry Battalion (INF) PA, ug ang 32nd Military Intelligence Company (MICO)- 3rd Military Intelligence Battalion (MIB) sa 31st Division PA.
Ang mga kanhi miyembro sa NPA gipresentar sa LGU sa Candijay, Bohol. Iproseso kini pinaagi sa Kauban sa Reporma Program (KRP), usa ka localized nga bersyon sa nasudnong Enhanced Comprehensive Local Integration Program (ECLIP) ubos sa Executive Order No 27 Series of 2023, nga gipirmahan ni Gobernador Erico Aristotle Aumentado.
Mahimo usab silang kuwalipikado alang sa ubang mga programa sa gobyerno nga gitumong sa pagtabang sa mga kanhi rebelde sa ilang reintegrasyon sa katilingban.
Ilawom sa administrasyon ni Gobernador Aumentado, padayon ang panawagan sa mga walhong grupo nga motahan na sa ilang kaugalingon ngadto sa sabakan sa gobyerno.
Ang Provincial Task Force to End Local Communist Armed Confilct (PTF-ELCAC) nga gipangulohan ni Romy Teruel, naglantaw nga mamahimong insurgency-free ang lalawigan sa Bohol.
Kahinumduman nga ang Bohol sa gihapon anaa sa ikaduhang pwesto sa pinaka-malinawon nga probinsiya sa Pilipinas diin nagsunod kini sa Davao. Subay usab sa strategic change agenda sa administrasyong Aumentado-Balite gitinguha ug gilantaw nga magpabiling insurgency-free ang lalawigan sa Bohol. (RTB)
