GITINGUHA sa kagamhanan sa Siyudad sa Tagbilaran nga kahatagan og lig-on nga mga lakang ang paghatag og kasigurohan nga walay pagpihig ang paghatag og katungod sa katawhan.
Kini pinasikad sa Sexual Orientation, Gender Identity, and Expression (SOGIE) nga matigayon ang katumanan pinaagi sa pagpirma ni Mayor Jane Yap sa Implementing Rules and Regulations (IRR) sa Anti- Discrimination Ordinance (ADO) subay usab sa pagsunod sa prinsipyo sa SOGIE nga maoy nagsilbing ngipon sa ipatuman nga lokal nga ordinansa sa kagamhanan sa dakbayan.
Nasayran nga ang maong Anti-Discrimination Ordinance o (ADO) ang napalabang sa nakalabaay nga mga tuiga, apan wala mahingpit sa pagpatuman tungod kay wala pa usab mapalabang ang IRR sa maong ordinansa.
Nagkanayon si Mayor Yap nga bisan pa man sa kakuwang sa IRR sa maong ordinansa ang kagamhanan sa siyudad ang nakapahigayon na sa pagtagad sa pagpihig sa mga LGBT sukad pa sa panahon sa iyang bana si Ex-city mayor ug FG Baba Yap karon.
Naglakip niini ang pagpatuman sa mga tunghaan sa ilang dili makiangayong polisiya sa matang sa tupi ug dili paghatag og pagtugot sa mga tinun-an nga mogradwar kon dili mosunod sa tukmang tupi ug isul-ob niini.
Samtang gihatagan usab og pagtagad sa kagamhanan sa siyudad ang dili makiangayong pagtagad sa mga establisamento ngadto sa mga empleyado nga sakop sa LGBT.
Ang kagamhanan sa siyudad adunay gigahin nga salapi alang sa LGBT organizartion sa pagahimuong mga kalihokan nga naglambigit sa SOGIE awareness ug ingon man pagselebrar sa tinuig nga Pride Month. (RTB)
