GIBUTYAG ni Atty. Jordan M. Pizarras kinsa usa inilang Appellate Lawyer sa nasud nga walay pili-pili ang makadawat sa SSS Survivorship Pension.
Kini nakadawat siya og reklamo sa usa ka byudad nga gi-deny sa SSS ang application niya kay matud pa, niretiro na ang iyang bana pagkaminyo nilang duha.
“Sayop na nga interpretasyon sa SSS law”, pamahayag pa ni Atty. Pizarras.
“Nag-pakanaog ang Korte Suprema wala pay tuig sa kaso nga Belinda D.R. Dolera v. Social Security System (G.R. No. 253940, October 24, 2023) nga sayop ang pag-deny sa claim sa usa byuda nga hing apply ug retiree’s pension kay paglapas kini sa “equal protection clause” sa atong constitution.”
Giklaro sa manlalaban nga anak sa lumad Dauisanon nga ‘applicable ang balaud sa tanang tawo busa tratuhon nga parehas’.
Ang amahan ni Atty. Pizarras nga si kanhi Provincial Treasurer, (+) Atty. Eufronio “Poniong” Miyacabas Pizarras lumad taga Dauis naminyo ni Conchita Matig-a Pizarras nga taga Dakbayan sa Tagbilaran.
“Ang balaod nag-sulti nga ang survivor (byuda) may katungod maka-dawat ug pension. Dili mahimo nga pilion kinsay makadawat kung byuda sa SSS member nga wala pa mo-retire o sa member mga retired na,” dugang pa niya.
Awhag pa ni Atty. Pizarras sa dunay susamang sitwasyon nga ipabasa ang maong Supreme Court ruling ug positibo siya nga i-process dayun SSS ang application for pension. (Kahlil Lester O. Camba)
