IKADUHANG tourist cruise ship ang mi-abot dinhi sa Bohol sakay ang mga 100 ka mga langyaw nga turista nga misuroy sa mga nagkadaiyang tourist spot sa lalawigan.
Pasado alas 10 sa buntag, Myerkules (Hunyo 26) sa dihang mi-angkorahe ang MV Heritage adventure nga barko atubangan sa Baluarte sa lungsod sa Baclayon.
Si Vi Orig Sumaoy municipal tourism officer sa Baclayon mibutyag nga 80 ka mga turista nga mikanaog sa barko og sakay sa ilang rubber boat paingon sa Baluarte kung asa naghuwat usab ang bus nga sakyan paingon sa country side tour. Samtang ang uban nagpahulagway pa sa naila nga Baclayon church usa sa mga tourist spot sa Bohol.
Matud ni Sumaoy nga ikaduhang higayon nga mi-angkorahe sa kadagatan sa Baclayon ang barko nga MV Heritage adventure. Ang una niadtong milabay nga tuig sa sama gihapon nga buwan.
Sa iyang bahin si Atty. Francis Penaranda manager sa Philippine Ports Authority sa Bohol mi-ingon nga sa nadawat niyang impormasyon ang mga langyaw naglangkob sa mga British, American ug Japanese.
Dunay 101 ka mga turista ang pasahero sa barko apil na ang mga crew ug gikan ang maong barko sa Masbate og nidiritso sa Bohol samtang paingon usab kini sa Surigao.
Matud ni Penaranda nga kini maoy ikaduhang cruise ship nga mi-abot sa Bohol ang una niadtong buwan sa Enero.
Ang Bohol naninguha sa malungtaron nga kaugmaran pinaagi sa paglahutay sa industries sa turismo ubos sa strategic change agenda sa administrasyong Aumentado-Balite. (RTB)
