NAHIMONG trahedya ang usa ka bakasyon dihang nalumos ang 64-anyos nga South Korean nga babaye sa swimming pool sa usa ka resort sa Panglao niadtong Martes (Hunyo 18) sa gabii.
Si Police Captain John Khalev Sanchez, hepe sa Panglao Police Station, niila sa namatay nga si Cho Kum Wah.
Matod ni Sanchez, napalgan si Cho nga wala nay panimuot sa pool sa Roman Empire Resort sa Barangay Tawala sa iyang bana nga si Sung Yul Yang kinsa maoy nipahibawo sa lifeguard.
“Kuyog ni sila sa iyang bana pero nilakaw ang bana unya pag balik niya galutaw na ang asawa,” matod ni Sanchez.
Ang lifeguard misulay sa pag-resuscitate kang Cho apan wala siya motubag.
Daling gidala sa mga sakop sa Panglao Emergency Rescue Unit si Cho sa Governor Celestino Gallares Memorial Hospital sa Tagbilaran City.
Apan, gideklarar siya nga dead on arrival sa nag-atiman nga doktor nga si Dr. April Batiancela. (RTB)
