NISAKA ang gidaghanon sa mga kaso sa dengue sa Bohol og 314 porsyento sa unang lima ka bulan sa 2024 kon itandi sa samang panahon sa miaging tuig.
Sa datus gikan sa Provincial Epidemiology and Surveillance Unit (PESU) nagpakita nga ang mga kaso sa dengue sa probinsiya gikan Enero 1, 2024 hangtod Hunyo 5, 2024 miulbo ngadto sa 2,518 gikan sa 608 sa samang panahon niadtong 2023.
Ang ihap sa mga nangamatay misaka usab ngadto sa lima gikan sa usa lang sa miaging tuig.
Base sa susamang datos sa PESU, ang pinakataas nga ihap sa mga kaso sa dengue natala sa Inabanga nga 420.
Ang lungsod gisundan sa Tagbilaran City, 225; Buenavista, 129; Getafe, 125; Tubigon, 94; Panglao, 93; Ubay, 91; Dauis, 89; Talibon, 87; ug Loay, 84.
Gipahinumdoman ni Provincial Health Officer Dr. Yul Lopez ang publiko nga ang paglikay sa dengue magsugod sa lebel sa panimalay.
“So sa balay palang, likayan nga magpundo og tubig. Kanang mga basa or umog na sinina, ganahan kaayo ang lamok ana, hasta drainage na clogged up,” matod ni Lopez.
Si Lopez niingon nga usa ka ordinansa nga nagmando sa mga barangay sa paghimo og Barangay Anti-Dengue Task Force gipatuman na apan ang Provincial Health Office (PHO) nitaho sa mga lungsod nga wala makapalihok sa ilang tagsa-tagsa ka task forces.
“Daghang mga bag-ong barangay official nga magkinahanlan pod og training mao na atong anti-dengue program coordinator si Leonidas Saniel, atong gipa suroy sa mga lungsod sa pag remind sa mga LGU nga palikon g’yud ang ilang mga task force,” said Lopez.
Ang task force maoy responsable sa pagpahigayon og surveillance sa mga panimalay sa barangay kon ilang gigamit ang 4S nga estratehiya sa Department of Health batok sa gikahadlokang sakit nga naglambigit sa pagpangita ug pagguba sa mga lugar nga breeding sa lamok; pagsiguro sa pagpanalipod sa kaugalingon; pagpangita og sayo nga konsultasyon; ug pagsuporta sa misting sa hotspot nga mga lugar.
Gimandoan usab ang pagpahigayon og information campaign sa tukmang pag-ila ug pagguba sa posibleng mga breeding ground sa mga lamok nga nagdala og dengue.
Ang anti-dengue task force gipangulohan sa barangay kapitan ug gilangkuban sa mga barangay health workers ug tanod, chairman sa komite sa panglawas sa Sangguniang Barangay ug chairman sa Sangguniang Kabataan.
Ang mga yunit sa task force mahimo usab nga mangayo og tabang sa mga boluntaryo gikan sa pribadong sektor. (RTB)
