TAGBILARAN CITY, Bohol (PIA)—Sa pagsaka sa kinatibuk-an nga bili sa mga nag-unang paliton dinhi sa Bohol nga gisunod pinaagi sa regular nga pagkolekta niini sa Philippine Statistics Authority (PSA), nasuta nga ang mga naka-ingon sa 1 ka punto nga pagsaka, ang pagtaas sa presyo sa paliton.
Kini kay nasubay sa PSA ang pagtaas sa inflation sa presyo sa paliton sa Bohol gikan sa 3.3 porsyento niadtong Marso ngadto na sa 4.4 porsyento sa Abril niining tuiga.
Hinuon, kining inflation rate, mas ubos pa kay sa nasinati nga inflation rate sa Bohol niadtong Abril 2023 nga misulbong sa 7.4 porsyento.
Ang subsob nga pagtaas sa presyo sa kinatibuk-ang tuig ilabi na sa pagkaon ug mga ilimnon nga dili makahubog, nga dako og gibug-aton, nakasinati og 6.4 porsyento nga inflation sa Marso ug 8.4 porsyento sa Abril.
Ang pagkaon may 74.8 porsyento nga angkon sa kinatibuk-ang epekto sa pagsaka sa mga presyo, labi na sa humay nga may 24.4 gikan sa 24.6 porsyento, ang karner ug ubang mga parte sa giihaw nga mga hayop sa 5.7 porsyento gikan sa 7.7 porsyento, gatas ug itlog nga may 4.0 porsyeni gikan sa 7.7 porsyento ug mga prutas nga nakasinati og 8.5 porsyento nga sulbong gikans a 11.5 porsyento.
Sa kinatibuk-an, ang food inflation sa Bohol, mingsapong sa 8.9 porsyento niining buwan sa Abril gikan sa 6.7 porsyento sa Marso, bisan pa nga mas taas pa gyud gihapon ang food inflation sa miaging tuig nga miabut sa 9.5 porsyento.
Sa tibuok tuig, ang presyo sa mga utanon, lagutmon, saging lung-agon, saging kilawon ug mga pagkaon nga gikan sa liso sama sa monggos, bisan pa kon gikan sa -3 porsyento na sa Abril, gikan sa -19.2 nga sumada sa us aka tuig nga pagkubos sa Marso.
Ang isda, mga kinhason ug uban pang buhilaman sa dagat nga gikaon, mitala usab og -0.7 porsyento gikan sa pagkahagsak niini ngadto 5.6 porsyento sa Marso.
Mingsirit usab ang pagtaas sa presyo sa giproseso nga pagkaon nga mingsulbong sa 8.1 porsyento gikan sa 5.8 porsyento sa Marso 2024. (PIABohol)
