NIABOT na sa P5.9 bilyones ka pesos ang kantidad sa danyos sa El Niño phenomenon sa sektor sa agrikultura matod pa ni bise-gobernador Dionisio Victor A. Balite, Ph.D.
Sigon ni Balite nga sa iyang nakuha nga datus isip pangulo sa Agriculture committee sa Sangguniang Panlalawigan nga mga 80,000 ka mag-uuma ang apektado sa El Niño tibook nasud diin ang labing dako kanila mao ang mga mag-uuma sa humay nga mokabat sa 60,000.
Base sa datus sa opisyal, 58,000 ka ektarya nga humayan ang grabeng naapektuhan tungod sa grabeng huwaw na nasinati karon sa Pilipinas.
Dugang ni Balite nga niabot sa P2.18 bilyones ka pesos ang mga hinabang ug interbensyon nga gipang-apod-apod sa Department of Agriculture ug ubang ahensya sa gobyerno ngadto sa mga mag-uuma nga apektado sa huwaw.
Apil na niini ang rice farmers financial assistance o ang pag-apod-apod og 5,000 pesos sa matag mag-uuma nga nagtikad og humay nga dili molapas sa duha ka ektarya, sigon sa bise-gobernador.
Samtang miingon si Balite nga P700 milyones ka pesos nga kantidad sa inputs sama sa pumps ug engines ang naapod-apod usab, P68 milyones ang gi-apod-apod sa Philippine Crop Insurance Corporation alang sa indemnification o insurance claims, ug kapin sa P10 milyones ang naapod-apod sa Konseho sa Patakaran sa Pang-agrikultura ug Pautang alang sa Survival and Recovery nga mga pautang.
Gibutyag usab sa ikaduhang-labaw nga opisyal sa Bohol nga ang National Irrigation Administration kon NIA nipagawas usab ug 300 milyones ka pesos alang sa irrigation intervention. (RTB)
