BISAN pa sa kalit nga mga pag-uwan sa adlawan o kagabhion sa bisan asang lugar sa Bohol, ang state weather bureau niingon nga ang taas nga temperatura sa panahon sa adlaw magpadayon, nga dala sa ting-init ug El Niño phenomenon.
Si Weather Specialist Jhomer Eclarino sa Regional Services Division sa Philippine Atmospheric, Geophysical and Astronomical Services Administration (Pagasa) Visayas niingon nga nilabay lang ang mga pag-uwan nga naimpluwensyahan sa Easterlies.
Ang Easterlies mao ang hangin nga gikan sa silangan, kasagaran sa mga tropikal nga rehiyon sama sa Pilipinas, nga nagdala og init, umog nga panahon ug panagsang pag-ulan.
“Naay change gihapon na passing light rains na kalit ra. But still taas ang time nga init ang panahon,” matod niya.
Dugang pa, ang Bohol nitala og 37 degrees Celsius nga heat index sa Martes, Abril 9, 2024 sa ala 1:00 sa hapon.
Ang numero ubos sa klasipikasyon sa hilabihang pag-amping, nga anaa sa taliwala sa 32 ngadto sa 41 degrees Celsius nga nagsugyot sa mga kainit ug kakapoy sa kainit posible, ug ang dugang nga kalihukan mahimong moresulta sa heatstroke.
Ang heat index o “feels-like” nga temperatura naghiusa sa temperatura sa hangin ug humidity aron makita kon unsa ka init ang bation sa lawas sa tawo sa panahon.
Sa pagkakaron, karong tuiga, siya niingon nga ang labing taas nga heat index nga natala sa Bohol niadtong Marso 27, nakatala og 37 degrees Celsius.
Gipadayon ni Eclarino ang ilang pahinumdom sa publiko kalabot sa taas nga heat index, sa ingon, gidasig sila nga sundon kanunay ang mga precautionary ug preventive measures alang sa kaluwasan sa panglawas.
Sa unang mga taho, ang Pagasa niingon nga ang kainit labing mabati gikan sa alas 10:00 sa buntag hangtod sa alas 4:00 sa hapon, apan usa ka eksperto sa Department of Health Central Visayas, nisugyot nga likayan na lang ang gawas sa alas 9:00 sa buntag.
Sa miaging buwan, si regional epidemiologist Dr. Eugenia Mercedes Cañal gikan sa Department of Health Central Visayas nagtakda og mga lakang nga sundon sa publiko karong panahuna.
Gawas sa paglikay sa gawas sa panahon sa peak hours kon ang heat index anaa sa pinakataas, girekomendar usab niya ang pagbutang og sunscreen kon magsuroy-suroy sa gawas ug gipasiugda ang kamahinungdanon sa pagpabilin nga hydrated pinaagi sa pag-inom og daghang tubig.
Sa laing bahin, ang heat index sa Bohol mahimo’ng moabot sa “delikado” nga 51 degrees Celsius sa umaabot nga mga buwan sigon sa weather company.
Matod niiini nga ang historical data nagpakita nga ang lalawigan sa Bohol kasagaran makasinati sa labing taas nga temperatura sa buwan sa Mayo diin niadtong Mayo 31, 2010, atol usab sa El Niño phenomenon, ang probinsiya nitala sa surface temperature nga 37 degrees Celsius.
Naatol kini sa pinakataas nga heat index nga 49 degrees Celsius ug gipasabot sa Pag-asa nga ang pagsaka sa heat index ang tungod sa El Niño phenomenon nga karon gi-categorize ubos sa huwaw ug sa nagpadayon nga dry hot summer. (RTB)
