TAGBILARAN CITY, Bohol (PIA) –Nagpaabut ang Bureau of Fisheries and Aquatic Resources nga may modala og mga specimen sa isda nga gikataho nga nangamatay ilawom sa kadagatan sa Lumayag Slope sa utlanan sa Guindulman ug Anda.
Kini ang pahayag sa BFAR, diha nga gipangutana kon ang nagka-init nga panahon, mao bay hinungdan nga nangamatay ang mga isda segun sa taho nga gisumsoman sa social media niadtong miaging semana.
Niadtong sitwasyona, ang Municipal Agriculture Office sa Anda o Guindulman unta ang manguha ug magpadala og specimen sa isda nagdto sa BFAR.
Hinuon, sanglit ang nangamatay nga isda didto sa ilawom sa dagat, labing maayo unta nga ang nakakita, makakuha og specimen aron ikahatag alang sa imbestigasyon.
Usa ka diver nga giila nga si Eleuterio Beruan Jr, ang mipadayag sa mga hulagway sa ilawom sa dagat sa Lumayag Slope diin makit-an ang mga usda nga naggipasad sa ilawom.
Didto sa labing uwahi nga tigum sa El Nino Task Force niadtong Biyernes sa hapon, gikataho usab ug gikahadlokan nga ang dili na mabangbang nga kainit. Maoy kina-ingan sa pagpangamatay sa isda.
Apan gipasabut sa BFAR nga nagpaabut sila nga may modala sa patay nga isda ngadto sa ilang buhatan aron mahimoan og pagtuon ug matumbok ang hinungdan sa pagpangamatay sa isda.
Hinuon, wala usab maghisgut ang BFAR ngano nga wala sa ilang buhatan nga mingsusi sa taho ug ming-adto sa lugar.
Apan, dugang sa BFAR, duha ka oras human makuha ang specimen, pwede pa nga eksaminon ang patay nga isda apan human sa upat ka oras, dili na kini mahimuslan pa sa pagtuon.
May mga taho na nga may padayon pa gihapon nga pagpangdinamita sa mga isda sa nahisgutang lugar kaniadto, hinuon wala nay nagsulti kon kini nagpadayon pa ba gihapon karon.
Alang sa mga mangingisda nga dinamitero, ang ilang mga kuha, ihatud pa gihapon sa merkado, mao nga mas maayo masayran kon unsaon pag-ila sa isda nga tinirohan.
Kasagaran sa isda nga tinirohan, magdugo nga mogawas sa hasang, nay dugo nga mapundo ilawom sa panit sa punoan sa ikog, tiyan, ug sa guwaanan sa hugaw niini.
Kon ang isda may himbis, kasagaran mangataktak ang himbis sa tunga nga bahin sa lawas, ug manggawas ang tinai sa gawasanan sa hugaw niini.
Kon magrabehan ang isda, mangapulpog ang mga bukog og madugmok ang nga tinae ug apdo. (PIABohol)
