GIPAIMBESTIGAR karon sa Department of Education (DepEd) ang mga reklamo nga dunay mga kawani niini nga namaligya og mga booklets o workbooks alang sa Catch-Up Fridays ug uban pa nga mga kalihukan.
Sa usa ka opisyal nga pamahayag, giklaro sa DepEd nga gidili ang maong mga pagpamaligya.
Matud pa sa pamahayag, kinaganglan nga way lahi nga galastohon ang mga Catch-Up Fridays ug ubang mga kalihukan.
Gipahinumduman ug gipasidan-an usab sa DepEd ang mga ginikanan ingon man ang mga tinun-an nga di modawat ug motugot niining mga gidili nga transaksyones.
Sumala pa sa DepEd, gisugdan na niini ang imbestigasyon kabahin ning maong mga reklamo.
Una nang ninggawas ang mga reklamo nga dunay naningil og bayad gikan sa mga gipaubos sa Catch-Up Fridays ug ubang mga kalihukan sa maong ahensya didto sa dakbayan sa Caloocan ug ubang mga tunghaan sa kaulohan.
Matud pa, bisan kinsa nga mapamatud-an nga sad-an sa maong modus pasakaan sa tukmang kasong administratibo.
Giawhag usab sa DepEd ang publiko nga direktang ireklamo ang mga ingon niini nga panghitabo sa buhatan sa kalihim, Bise Presidente Sara Duterte sa osec@deped.gov.ph. (RTB)
