ANG pagtumaw sa mga online o mobile wallet service ug mga remittance centers maoy usa sa mga hagit sa Philippine Drug Enforcement Agency (PDEA) sa kampanya batok ilegal nga drugas. Kini ang gipadayag ni Milva Mojado investigation agent sa PDEA-7.
Sumala ni Mojado adunay bag-ong players o bag-ong nisulod sa kalihokan sa ilegal nga drugas sa tibook Visayas. Aduna usab mga drug surrenderees nga nibalik sa maong bisyo ug adunay “improvised” nga pamaagi sa pagtanom og marijuana nga niabot na sa mga condo unit.
Ang Central Visayas nahimo usab nga “entry” ug “exit” point sa negosyo sa ilegal nga drugas gikan sa National Capital Region (NCR) ug sa mga rehiyon sa Mindanao.
Sumala sa PDEA, nga apil sa ilang hagit ang dili madetect o masayran nga pagpasulod sa ilegal nga drugas pinaagi sa mga kaislahan sa rehiyon-7.
Ang mga online e-wallet service ug mga remittance centers gigamit na usab sa mga nalambigit sa ilegal nga drugas sa ilang mga transakyon.
Sa 340 ka operasyon sa PDEA sa unang mga bulan sa tuig 2024, moabot sa 452 ka personalidad ang naaresto niini nga adunay kalambigitan sa ilegal nga drugas. (RTB)
