TAGBILARAN CITY, Bohol (PIA) –Labing dako na ang P30 nga kinatibuk-ang patong sa presyo sa isda nga gikompra gikan sa mga fish landing sites hangtud sa nakapalit niini.
Kini maoy gipasalig ni Provincial Administrator Aster caberte, kinsa, sa mandu ni Gobernador Erico Aristotle Aumentado, nagpatigum ang mga supplier sa isda nga nag-unang komprador gikan sa mga lantsa nga nanagat sa kadagatan sa Bohol.
Hinuon ang pasalig ni PA Caberte, magdepende sa lungsod nga makahimo sa ilang kaugalingon nga Municipal Price Coordinating Council (MPCC) subay sa gimando sa gobernador nga buhi-on ang mga MPCCs.
Nagtapok kita sa mga fish dealers ug suppliers, ug nagkasabut nga ang P30 mao na ang labing dako nga patong sa komprada sa isda nga itumbatumba og baligya, matud ni PA Caberte.
Sa kasamtangan, kon mapalit ang isda og P150 and kilo didto sa landing site, kasagaran patungan kini og P10-20 ang dealer sa stalls. Kon komprahon kini ug ibaligya na usab, sama sa mga suroy, matag komprador kasagaran mopatong og tag P20 ang kilo mao nga ang tag P150, mosobra na sa P200 ang kilo sa suroy.
Tumong sa MPCCs nga istabilize ang presyo u gang supply sa mga paliton pinaagi sa pagmonitor sa dagan sa presyo ug magtuon sa unsay naka-ingon ug diin dapita sa value chain ang kina-ingnan sa pagsulbong sa presyo sa paliton ilabi na sa mga produkto sa umahan ug sa kadagatan.
Ang MPCC usab mahimong magmandu sa task force niini sa pagpanakop sa mga masakpan nga magpaborot sa presyo, ilabi na sa sobra nga pagpaginansya sa isda ug mga produkto gikan sa umahan.
Sa presyo sa isda pananglitan, kon ang presyo sa landing sites anaa sa P150 ang kilo, kini ipahibaw ngadto sa mga MPCCs kinsa maoy magbantay sa kalungsuran ug manakop niadtong magbaligya sa isda nga sobra sa P180, human sa P30 nga patong isip ginansya.
Segun sa Memorandum Order No 2024 -018 ni Gob Aumentado nga nagmandu sa pagbuhi sa MPCC, ang masakpan nga magpaborot sa presyo, subay sa Consumer Act of the Philippines nga mas nailhan nga Price Act
Sa Price Act, sa Section 6 ug 7, us aka tuig ngadto sa 10 ka tuig ang pagkapriso ug multa sa P5 mil nadto sa us aka milyon, depende sa kadakuon sa salaud. (rahc/PIA-7/Bohol)
