ANG mga Filipino octogenarians ug nonagenarians, o kadtong anaa na sa 80s ug 90s, makadawat na og P10,000 nga financial assistance matag lima ka tuig human gilagdaan ni Presidente Ferdinand R. Marcos Jr. ang gipalapdan nga Centenarian Law niadtong Lunes sa Palasyo sa Malacañan.
Ang Republic Act No. 11982 naglakip sa tanang Filipino, nagpuyo sa Pilipinas o sa gawas sa nasud, nga makadawat og cash gift inig abot sa 80 anyos ug matag lima ka tuig hangtod sa edad nga 95.
Ang kasamtangang RA No. 10868 o ang Centenarian Act of 2016 naghatag lamang og usa ka higayon nga cash incentive nga P100,000 ngadto sa mga centenarians, o kadtong nakaabot sa edad nga 100, uban ang sulat sa pagpasalamat nga gilagdaan sa Presidente o posthumous plaque sa pag-ila kun ang centenarian namatay.
Gitawag ni Presidente Marcos ang gipalapdan nga balaod isip pagpasidungog sa kinaiya sa mga Pilipino sa kalooy ug nagpakita sa mabination ug mahigugmaong pag-atiman sa mga tigulang.
Ang RA 11982 nagmugna usab og Elderly Data Management System aron mailhan ang mga senior citizen nga angayan nga makapahimos sa mga benepisyo sa gipalapdan nga balaod, pag-ila kun namatay ang centenarian.
Ang Grant of Benefits to Filipino Octogenarians nagpalapad sa coverage sa RA 10868, o ang Centenarians Act of 2016, aron i-apil ang tanang Pilipino, nagpuyo man sa Pilipinas o sa gawas sa nasud aron mahimong makadawat sa cash gift nga nagkantidad ug P10,000 sa pag-abot sa edad nga 80 ug matag lima ka tuig pagkahuman, o hangtod sa edad nga 95.
Gipasabot usab sa Presidente nga ang pagpalapad sa coverage sa Centenarians Act usa ka pagpasidungog sa kinaiya sa mga Pilipino sa pagkamabination, ug sa kultura sa Pilipinas, nagpakita kini og dugang nga pagkamabination ug kalooy sa mga tigulang.
Giila usab sa balaod ang himsog, aktibo ug taas nga kinabuhi sa mga tigulang. (Elvira Bongosia /PIA7 Bohol)
