KAPIN sa P30 milyunes ang balor sa gidiling drugas nga nasakmit sa duha ka managlahing mga operasyon sa kapulisan sa Central Visayas niadtong Pebrero 27, 2024.
Alas 10:56 sa gabii sa Purok 7, Barangay Mansasa, dakbayan sa Tagbilaran, kapin sa upat ka kilo sa gituohang shabu nga dunay standard drug price nga P27,404,000 ang nasakmit sa buy-bust sa Bohol Police Provincial Office (BPPO).
Nasikop ang manag live-in partner nga sila si Peter John Cuadra, 24, ug Mary Ann Miano, 19, tinun-an sa usa ka unibersidad sa Tagbilaran, taga Habitat Village, Barangay Pool, Tagbilaran.
Nangulo sa operation ang hepe sa Provincial Drug Enforcement Unit (PDEU) nga si Police Captain Yolando Bagotchay Jr. ug Police Lieutenant Ariel Aspiras ubos sa supervision ni Police Lieutenant Colonel Joemar Pomarejos, hepe sa Provincial Intelligence Unit (PIU) sa BPPO.
Matod ni Police Lt. Col. Norman Nuez, information officer sa BPPO, bag-o pa nigawas ang ngalan sa mga suspek sa negosyo sa drugas.
Giingong mao na kini ang panginabuhian sa duha, ang pag dispose sa ilegal nga drugas gikan, matod pa, sa wala mailhi nga supplier.
Matod pa, dunay manawag kanila nga dili magpaila aron mopahibawo nga dunay moabot nga supply sa ilegal nga drugas.
Kini na usab ang mohatag og instructions kon pila ang ihatag sa ilang kustomer ug ang pagbahinbahin sa drugas.
Si Peter John, matod pa, ang mo-repack samtang ang iyang live-in nga si Mary Ann moapud-apod sa ilang suki nga drug players sa Bohol bugti sa komisyon nga P50,000 kon mahurot ang usa ka kilo.
“So, ingon ana ang ilahang transaction sa drugs, bali term nato ana bodegero, so, ang hatdan nila wala sad sila kaila kinsay hatdan na pud,” matod ni Nuez.
Nipalawom pa karon sa ilang imbestigasyon ang kapulisan sa Bohol kon asa giagi ang kinilo nga supply sa ilegal nga drugas. (RTB)
