SAYO ang bakasyon sa elementarya ug sekondarya sa nasod subay sa desisyon sa Department of Education (DepEd) nga ibalhin ang pagkatapos sa School Year (SY) 2023-2024 sa Mayo 31 gikan sa Hunyo 14.
Ang DepEd mopatuman og adjustment sa mga aktibidad sa nahibiling mga adlaw sa SY 2023-2024 aron hinayhinay nga ibalik sa Abril ngadto sa Mayo ang school break.
Ang Department Order (DO) 003 nagtakda sa duha ka mga bulan nga pahulay gikan sa Hunyo 1 hangtod sa Hulyo 26.
Dugang sa DO, hinayhinay ang pagbalhin aron malikayan ang pagkabalda sa mga adlaw sa eskuylahan nga gikinahanglan sa tanan nga learning competencies.
Ubos sa DO 003, gitakda sa DepEd ang third quarter examinations sa Marso 25-26, ug fourth quarter exam sa Mayo 16-17.
Ang DepEd niawhag sa mga tunghaan sa pagpahigayon sa ilang tagsa-tagsa ka end of the school year rites gikan sa Mayo 29 hangtod 31.
Ang mga nasudnong kalihukan sa DepEd: Palarong Pambansa – Hulyo 6-17; National Festival of Talents – Hulyo 9-13; National Schools Press Conference – Hulyo 9-13; ug Learners’ Convergence – Hulyo 9-15.
Ang opisyal nga pagsugod sa School Year 2024-2025 karong Hulyo 29. Kini matapos sa Mayo 16, 2025 sigon sa DepEd. (RTB)
