PATAY ang usa ka tripulante sa Ocean Jet fastcraft human kini aksidenteng natagak sa dagat ug nakaon sa propeller nga padung na untang molarga paingon sa Syudad sa Sugbo gikan sa Fast Craft Port, Tagbilaran City, udto kaniadtong Biyernes, Pebrero 23, 2024.
Ang biktima nailhan sa ngalan nga Marcelo I. Casulocon.
Matud pa ni Police Captain Ruel R. Deocampo, Station Chief, Bohol Maritime Police Station nga sa ilang pasiunang imbestigasyon naghan-ay sa mga bagahe sa pasahero si Casulocon, apan aksidenteng nadakin-as ug nahulog sa ulin nga bahin sa fastcraft.
Ang insidente nakuha sa CCTV camera, nakita didto nga gitabonan ni Casulocon og tarpaulin ang mga bagahe apan nadakin-as kini ug nalahos og katagak sa dagat samtang nagmaniobra na palayo sa pantalan ang fastcraft nga iyang gisakyan.
Wala dayon nahibaw-an ang nahitabo kaniya, ayha ra sa dihang nag-accounting sa mga tripulante mao nga gisubay ang kuha sa ilang CCTV ug nakita ang nahitabo kaniya.
“Eventually ilang gi check ang CCTV nag atubang sa likod nakita nila nga na slide kini si Marcelo I. Casulocon,” sigon ni Deocampo.
Sa maong hitabo ang nianang 11:55, si Glen Castor, pangulo ssa Ocean Jet Marine Division mikontak sa coastguard sa Tagbilaran ug nipahiabalo sa nahitabo kang Casulocon.
Dihang naalarma na ang pantalan, ang Inspector sa BTH Security Agency nga si Rolly Pacaldo nakabantay og matud pa daw karne nga naglutaw diha sa lugar diin nidunggo ang maong fastcraft hinungdan nga ilaha kining gi-report sa mga otoridad.
Ang Tarsier 117 ug CDRRMO naabot sa lugar kauban ang mga SCUBA divers aron pagsusi ug nasuta nga parte gyud kini sa lawas sa tawo nga gituohang iya ni Casulocon.
Ang mga divers hinayhinay nga nihaw-as sa mga parte sa lawas sama sa kamot, bahin sa ulo, bukog, ug handheld radio ni Casulocon gikan sa ilawom sa pantalan.
Ang PCG ug Maritime Police naghimo na og dugang imbestigasyon bahin sa maong hitabo. (RTB)
