TAGBILARAN CITY, Bohol (PIA) –Gikan lamang sa Department of Labor and Employment (DOLE), alang sa 2024, nangayo na si Gobernador Erico Aristotle Aumentado og P30 milyones (M) nga tugbangan usab sa Bohol og P20M aron ika-abag sa mga Bol-anon’g naghugop aron magtinabangay sa pagpangitag dugang kita ug kapanginabuhi-an.
Kini ang gibutyag sa program coordinator alang sa Livelihood sa DOLE Integrated Livelihood and Emergency Employment Program (DILEEP) didto atul sa Kapihan sa PIA, niining semanaha.
Gibutyag ni Estrella Verenio, livelihood coordinator sa DILEEP nga anaa magbase sa bag-o lamang na-umol nga Provincial Cooperative Development Office (PCDO), nga kon matuman ang hangyo, may P50M na usab nga ikapang-apud-apod sa mga kahugpungan ug kooperatiba nga nangita’g dugang ikaabag sa ilang mga paningkamot nga makakita og dugang tinubdan sa kapanginabuhian.
Dugang niya nga sa sa 2023, kinatibuk-an nga P16.3 M ang kinatibuk-ang pundo sa DILEEP nga napadagayday ngadto sa mga kahugpungan sa tulo ka mga Distrito sa Bohol, accomplishment nga ikapakita sa PCDO livelihood component coordinator sa buhatan ubos sa Governor’s Office nga usa ka tuig pa lamang gikan nahimo nga institusyon.
Ang DILEEP maoy abag sa DOLE sa programa sa kagamhanan sa mas lapad nga kaugmaran pinaagi sa pagpasugod og kapanarbahoan ug pagkunhod sa kawad-on, subay sa programa nga anaa sa DOLE.
Sa pundo sa kagamhanan, maghatag ang DILEEP og grants ngadto sa mga pundok, hugpong ug kooperatiba aron may magamit sila nga puhunan nga ikasugod sa kapanginabuhian, pagpadako sa nasugdan na nga negosyo o pagpahiuli ug pagpabalik sa negosyo nga napaundang tungod sa katalagman, pasabut ni Verenio, kinsa una na nga nahimong livelihood coordinator sa buhatan ni kanhi Kongresista ug karon gobernador Aumentado.
Karon nga anaa na sa PCDO, si Verenio, nga taga Talibon ug may taas taas na nga kasinati-an sa non-government organizations sukad pa sa Project SeaHorse, Habitat ug mga NGOS nga naglihok sa ika duhang distrito sa Bohol, mao na ang province-wide coordinator sa DILEEP.
Gawas nga sila ang magtabang aron mahugpong ang mga katawhan nga nanginahanglan og dugang tinubdan sa panginabuhi-an, makatabang usab ang PCDO sa pagparehistro sa mga kahugpungan sa tinabangay, ngadto sa mga ahensya nga mag-accredit niini.
Makatabang sila alang paghino s amga rekisitos sa hugpong alang sa accreditation sa Cooperative Development Authority, Securities and Exchange Commission ug sa DOLE.
Ang pagkarehistrado niining bisag usa sa tulo ka mga ahensya, maoy gikinahanglan aron ang kahugpungan makakuha og tabang pundo gikan sa kagamhanan pinaagi sa DILEEP.
Sa 2023, matud ni Verenio ngakinatibuk-an nga P7.8 M ang nahatag isip grants sa mga kahugpungan nga nakakuhag DILEEP sa una ug ikatulo nga Distrito sa Bohol.
Lain pa usab nga P8.5 M ang pundo sa DOLE nga nabubo ngadto sa Ikaduhang Distrito sa Bohol, dugang sa PCDO.
Si Verenio uban sa mga opisyales sa Alburquerque Tricycle Drivers Association pinangulohan ni Antonio Labunog, president ug sa project manager sa Asenso Panginabuhian sa Isla Panggapasan Association (APIPA) nga si Elvie Baculao, mapamatuod nga ang tabang sa kagamhanan sa katawhan nga gipaagi sa mga opisyal sama ni Aumentado ug sa kagamhanan sa Bohol, tinuod gayud nga magamit ug makatabang. (PIABohol)
