NAGBANGI na ang kanhi ug kasamtangang Presidente sa nasud Pilipinhon. Ug usa sa ilang gibato sa usa’g-usa, nga nigamit kuno og drugas.
Si kanhi Presidente Rodrigo Duterte, niingon nga “May Presidente tayong addict.”
Iyang gibatbat sa usa ka panagtigum nga gitawag og “Hakbang ng Maisug” Leaders Forum sa Davao City, nga sa dihang Mayor pa siya sa Davao, iyang nakit-an sa listahan sa iyang kaila sa PDEA nga apil sa druglist si Marcos Jr.
Nitubag si PBBM nga nakasulti kuno si FPRRD sa maong akusasyon tungod sa epekto sa fentanyl, usa ka isog kaayong druga isip pain reliever.
Ang kasamtangang mayor sa Davao City nga si Baste Duterte, nanawagan nga paambakon sa puwesto si PBBM.
“Mr. President, kon wala kay gugma ug aspirations sa imong nasud, resign!”
Niingon usab si Mayor Baste nga walay utang-kabubut-on si PBBM ilabina si Digong nga iyang amahan, maoy nagpalubong sa Libingan ng mga Bayani ni kanhi Presidente Marcos Sr., amahan ni Bongbong.
Mahog nga nilaban si Baste sa iyang ate nga si Bise-Presidente Sara Duterte tungod sa dili kuno patas nga pagtratar sa mga tawo ni PBBM sa Palasyo ngadto ni Sara.
Samot og kasuko si Digong ngadto ni PBBM kay wala kini kabadlong ni House Speaker Ferdinand Martin Romualdez nga maoy gipasumanginlan nga nagpaluyo sa planong pag-usob sa Batakang Balaud o ang giduso nga “CHA-CHA/Charter Change”.
Si Romualdez nihimakak sa maong alegasyon.
Apan ang igsoon ni PBBM nga si Senator Imee Marcos, kumbinsido nga si Romualdez, nga iyang ig-agaw og tagsa, maoy nagpaluyo sa maong lakang nga gipaagi karon og “People’s Initiative” nga nangolekta og pirma sa katawhan, bugti sa salapi, matud pa.
Niingon usab si Sen. Imee nga plano ni Romualdez nga mahimong Prime Minister maong atat nga usbon ang 1987 Philippine Constitution, kay dili kini makadaug sa pangandoy nga mag-Presidente karong 2028.
Si Bise-Presidente Sara maoy gitan-aw sa katawhan nga magpapili pagka-Presidente.
Apan nibirada si Romualdez batok Digong nga sama sa nasuya ang naulahi tungod kay wala kini nagmalampuson sa CHA-CHA sa dihang mao pa kini ang Pangulo sa Pilipinas.
Si Sara sa iyang bahin nagpakahilom lang apan niuyon sa lakang ni Baste nga “nilaban” lang kaniya isip ate kay nasakitan sa dili maayong pagtagad sa mga sakop sa Kabinete ngadto sa Bise-Presidente.
Apan anaay niingon nga pipila, nga ang mga politiko nag-away kay anaay tagsa-tagsa ka interes.
Nibanat si Digong batok PBBM ug Romualdez tungod kay gusto niining mahimong Presidente si Sara karong 2028.
Si PBBM, masabot nga adto gayud modapig sa iyang agaw og tagsa nga mao ang kasamtangang House Speaker karon sa Kongreso.
Kon unsa may sangputan sa away sa duha ka pinaka-dagkong pamilya sa politika karon sa Pilipinas, ang ordinaryong katawhan gihapon ang makaluluoy ilabina kon masayop sa pagpili og mosunod nga pinakataas nga lider sa nasud.
Kay kon ako ang pasultihon ug papili-on, si Sara maoy akong Presidente sa 2028.
Kay kon ituboy sa pamilyang Marcos si Romualdez, atong hinumduman nga naila ang maong pamilya sa dautang imahe panahon ni Marcos Sr. – ang giilang diktador ug pinakakurakot nga lider sa kalibutan.
Mo-salig pa ka?
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
