TAGBILARAN CITY, Bohol (PIA) –Gituki na ug anaa na sa ikaduhang pagdungog ang suliran sa pagdumili sa mga kalungsuran nga magamit sa mga mayor ang intelligence funds, gawas pa sa pundo nga gitagana alang sa programa ug mga proyekto nga magpatunhay sa kahapsay ug kalinaw.
Kini maoy gipadangat ni Board Member Tomas Abapo, kinsa mao usab ang chairman sa Sangguniang Panlalawigan Committee on Peace and Order.
Didto sa labing bag-o nga joint meeting sa Provincial Peace and Order Council (PPOC) didto sa Ceremonial Hall sa Capitolyo Enero 10, gipresentar ni Gobernador Ercio Aristotle ug sa Provincial Budget Officer Ross Peter Retutal ang mga pahat alang sa mga programa ug proyekto nga nasulod sa Annual Budget sa Capitolyo nga motampo alang sa pagpatunhay sa kahapsay ug kalinaw sa Bohol.
Unod sa SP Appropriations Ordinance No 2023-017 ang kinatibuk-an nga P400,548,378 ug wala pa maglakip sa Intelligence funds sa gobernador nga mokabat sa P28 milyones.
Niini, mibarug si Dausi mayor Roman Bullen aron isumbong sa PPOC nga ang iyang lungsod nagdumili sa pagpagamit sa intelligence fund nga P1 milyon.
Nunot niini, mitambag si Gob Aumentado sa mayor nga ipasaka kini ngadto sa kahugpungan sa mga mayor sa League of Municipalities of the Philippines aron kahimoan og aksyon.
Sumpay usab ni BM Abapo nga gituki na sa SP ang nasampit nga suliran nga mahimong maka-angin sa mga angay nga buhaton unta sa Chief Executive Officer sa lungsod aron mapatunhay ang kahapsay ug kalinaw.
Hinuon, wala na ipatin-aw pa ni Abapo ang iyang gipaambit.
Gidugang niya sa pagpahibaw nga ang SP sa Bohol, anaa na sa ikaduha nga pagdungog sa suliran ug mamahimong may ipagawas nga ordinansa kabahin sa pagpugos sa mga magbabalaod sa mga konseho nga ikapagawas ang pahat alang sa intelligence operations sa mga kalungsuran, aron mapatunhay ang kalinaw ug kahapsay dinhi. (rahc/PIA-7bohol)
