MAKATAGAMTAM na unya sa dili madugay ang mga Bol-anon sa mga tourist spots, resorts ug hotel dinhi sa probinsiya sa pinasahi o mas ubos nga bayrunon.
Sa privilege speech atol sa regular session sa Sangguniang Panlalawigan (SP) niadtong Martes, si Bokal Nathaniel Binlod sa iktulong distrito sa Bohol nisugyot og inisyatiba sa pag-awhag sa mga resort, hotels, tourism ug recreational site operators sa paghatag og discounted rates alang sa accommodation ug entrance fees sa mga Bol-anon
Ang maong lakang nagtumong sa pagpasiugda sa lokal nga turismo ug paghatag ug mas dakong oportunidad sa mga lokal nga makasinati ug makabenepisyo gikan sa atong kaugalingong mga atraksyon sa turismo ingon man sa mga pasilidad ug kalingawan sa mga resort ug uban pang mga recreational sites sa mas ubos nga presyo kay sa naandan nga bayranan sa langyaw ug dili lokal nga mga turista.
Sigon ni Binlod, ang dugang nga mga aktibidades nga may kaangtanan sa turismo nga nagalakip sa mga lokal mahimo pa nga makapadasig sa pagtubo sa lokal nga ekonomiya.
Unang gipasigarbo ang usa ka inisyatiba sa lokal nga kagamhanan sa lungsod sa Carmen diin ang mga lumulupyo niini gihatagan og 100% nga diskwento ug 50% nga diskwento alang sa mga Boholano nga makapakita og mga balido nga identification card sa pagbisita sa sikat sa tibook kalibutan nga Chocolate Hills.
Sa pag-aksyon sa sugyot ni Binlod, ang mga kaubang bokal sa Sangguniang Panlalawigan sa Bohol nagkauyon nga i-refer ang maong butang ngadto sa SP Committee on Tourism alang sa deliberasyon ug diskusyon. (RTB)
