ANG internal problems sa nasud Pilipinhon sama sa inhustisya, korapsyon ug ang away sa gahum sa mga nagbanging lider, maoy dakong tampo sa gubot nga pang-gobyerno sa Pilipinas.
Daghang nirebenta sa atong gobyerno kay wala na kasabot sa pamaagi sa mga ana-a sa taas o ang mga dagkong lider.
Matud sa akong kaila nga politiko, dili mawala ang mga rebelde bisan kinsa pa ang molingkod nga maoy mangulo sa katawhan.
Ang mga kabus maoy kasagarang biktima sa sistema, kay kon kinsa ang mga ana-a sa gahum, kasagaran kaugalingong kabulahanan o interes ang gipasulabi.
Sa akong kaugalingong pagsabot, kon mo-hari ang tingog sa katawhan, anaay balanse nga pagdumala kay mapakgang man ang interes sa mga abusadong lider.
Sa hisgutanan sa inhustisya, tulo ang akong nakit-ang buslot: una, ang sistema nga nag-ingon nga ang hustisya alang lang sa nga adunahan ug gamhanan. Ug ikaduha, ang pagkalisod sa pag-angkon niini ilabina kon huyang sa kapasidad nga mosukol. Ang nagdugang niini mao ang dili pagpakabana, maong malubong sa limot ang pagkab-ot niini.
Ang korapsyon sama nga ‘built-in” na kini sa atong sosyodad nga naggikan pa sa panahon ni Kristo.
Ang pagluib sa usa sa iyang dose ka mga disipulo nga si Judas tungod sa salapi, usa ka pananglitan sa korapsyon.
Ang korapsyon usab dili lang sa kuwarta ug gahum, apan ana-a usab sa pagkatig-a sa kaugalingon. Anaay mga lakang sa atong kinabuhi nga kita nahimong kurakot apan wala nato nabantayi.
Ang pag-inilugay sa gahum sa mga dili kontentong lider sa katawhan, maoy nakapapagan kanato.
Kon ang gobyerno mismo wala kasulbad niini sa dugay’ng panahon, unsa pa’y atong lauman? Milagro na lang siguro maoy paabuton.
Kon dili patas ang atong katilingban, tungod man sa mga iresponsableng lider o sa gubot nga sistema, kita na lang maoy mo-adjust ug maningkamot kon sa asang dapit kita mo-prosper.
Ang dag-anan na lang nato niini ang kaugalingong paningkamot, kay kon magsalig kita sa atong mga lider, dili sa tanang panahon matubag ang atong mga yangungo.
Ang pagkalahi-lahi og prinsipyo ug ideyolohiya, maoy kasagarang magtukmod kanato nga kita mahimong biktima sa sistema.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
