PATAY ang usa ka 22-anyos nga lalaki samtang nanagat gamit ang dinamita sa kadagatan sa Bien Unido sa dihang ang homemade explosive device daling mibuto samtang gigunitan pa sa iyang kamot.
Ang pamilya sa namatay nga giilang si Jericho Batonghinog una nang mihimakak nga siya ilegal nga nanagat apan sa imbestigasyon sa kapulisan napamatud-an nga namatay gyud siya tungod sa pagbuto sa dinamita.
“Una maning gilimod sa pamilya pero base sa among imbestigasyon confirmed gyud nga naigo siya sa dinamita nga iyang gihuptan,” matod sa Bien Unido Police Station.
Ang pagbuto nahitabo sa kadagatan sa isla sa Bilang-Bilangan nga naila nga hotbed sa dynamite fishing.
Matod sa kapolisan, naputol ang duha ka kamot ni Batonghinog samtang grabeng nasunog ang dughan tungod sa pagbuto.
“Pagsugod niya og paniro naghawid siya adtong dinamita padong na unta niya ilabay unya kalit lang nibuto diha pa sa iyang kamot wa pa niya mabuhi,”
Ang igsuon niini nga si Nico, nga nanagat sab sa duol sakay sa lain nga sakayan, niluwas kang Jericho kinsa daling midala sa ospital.
Gitambalan pa si Jericho sa tambalanan apan sa ulahi nakabsan sa kinabuhi.
Matod sa kapolisan sa lungsod, bag-o lang nakat-on si Jericho sa pagpangisda gamit ang dinamita. (RTB)
