SUPORTADO sa unang babayeng kongresista sa Segundo distrito sa Bohol ang pag-aprobar sa House of Representatives sa sugyot-balaudnon nga nagtumong sa pagpataas sa Teaching Supplies Allowance (TSA) sa mga magtutudlo gikan sa kasamtangang P5,000 ug himoong P10,000.00.
Sumala pa ni CongW. Vanessa ‘Vanvan’ Cadorna-Aumentado nga alang sa school year 2024-2025 ang TSA anaa lang sa P7,500.00 pero sa mosunod nga mga tuig P10,000.00 na.
Sigon ni Aumentado nga sa wala pa ang ubos balay-balauranan nagpahulay sa katapusan sa tuig sugod kaniadtong Disyembre 14, 2023, ang balaudnon nakakuha sa mayoriyang suporta sa mga kongresista diin 247 ang pabor ug walay misupak sa maong House Bill No. 9682.
Gipasabot ni CongW. Vanvan nga ang nasangpit nga balaudnon maoy pag-ila sa “selfless service of our educators” ug “pagpauswag sa kaayohan sa mga magtutudlo sa publikong eskwelahan.”
Dugang sa magbabalaod nga ang nasangpit nga allowance mahimong kabahin sa outlay sa Department of Education (DepEd) ubos sa tinuig nga General Appropriations Act (GAA).
Ang TSA mahimong gamiton sa pagpalit sa mahikap o dili mahikap nga mga gamit sa pagtudlo, mga materyales, pagbayad sa incidental expenses ug sa pagpatuman sa lain-laing mga learning delivery modes, dugang ni Aumentado.
Samtang suportado usab ni CongW. Vanvan ang sugyot-balaudnon nga pagpataas sa salary grade level sa mga public elementary ug high school teachers gikan sa Grade 11 ngadto sa Grade 19 bisan pa sa padayong pagsaka sa gasto sa panginabuhi sa nasod.
Subling gipasabot sa kongresista nga katungdanan sa Estado nga “makapahimo ug mapadali ang paborableng kondisyon sa pagtrabaho alang sa mga magtutudlo ug pagsiguro nga ang propesyon sa pagtudlo makadani ug magpadayon sa angay nga bahin niini taliwala sa labing kaayo nga magamit nga mga talento sa nasud.”
Ang DepEd gikinahanglan usab nga maghimo ug usa ka espisipikong programmed budget aron mapun-an ang mga galastuhan alang sa usbaw sa mga lebel sa sweldo alang sa mga posisyon sa plantilla sulod sa lima ka tuig aron mahatagan ang DBM og igong panahon sa paghimo sa tukmang mga kausaban sa pagpatuman sa mando.implementasyon sa maong balaod, sigon pa ni CongW. Vanvan Aumentado. (RTB)
