TAGBILARAN CITY, Bohol (PIA) – Mitaas og 4.2% ang Gross Domestic Product (GDP) sa Bohol sa 2022, kon itandi sa milabay nga tuig, kini maoy maayong balita nga gipaambit atul sa Data Dissemination sa Bohol Provincial Products Account (PPA) didto sa Reynas Hotel, Nobyembre 29.
Ang GDP nagpasabut sa bili sa serbisyo ug mga paliton nga gigamit sa tawo sa usa ka tuig ug kini maoy mga produkto ug serbisyo nga gikan ra usab sa susamang nahisgutang lugar.
Kini ang kinatibuk-ang kantidad sa mga produktong namugna ug serbisyo nga natanyag nga nagsangga sa ekonomiya sa usa ka lugar, ug kini sukdon pinaagi sa pagkaltas sa bili o serbisyo nga gikinahanglan sa pagmugna niini.
Ang PPA usab, usa ka mekanismo sa Philippine Statistics Authority7 (PSA) aron tapokon ang tinuig nga mga banabana sa GDP sa mga lalawigan ug Highly Urbanized Cities subay usab sa Regional Ug National Accounts sa nasud, aron ikatandi kini sa miagi nga mga tuig ug aron makit-an ang dagan sa ekonomiya.
Una nga napatuman sa tibuok nasud dinhi sa Central Visayas, sukad niadtong 2021, ang PPA anaa na sa 82 ka lalawigan ug 17 ka highly urbanized cities.
Matud ni Bohol Provincial Statistician Jessamyne Anne Alcazaren, mitala ang Bohol og pagtaas sa GDP niini sa 2022 nga miabut sa 7.1 %, ug gibanabana nga nakaabut sa 171.09 bilyones.
Kini milapas sa 11.27 bilyones sa 2021 nga GDP nga natala sa 159.82 bilyones niadtong mga tuiga.
Dinhi usab sa Bohol, sa 2022, gawas sa Agricultura, Pangisdaan ug Pangkahoyan (Agriculture, Forestry and Fishery) nga ming-usos og 9.5%, ang tanang industriya mipakita na og maayong timailhan, human sa pandemya niadto nga 2020.
Sa tanang industriya nga gisaligan sa Bohol, ang wholesale ug retail, negosyo sa pag-ayo sa mga makina ug motor lakip na ang pag-pahiuli sa mga motorsiklo, transportasyon ug pagtipig sa mga kabtangan ug construction maoy nag-una nga mga mitampo alang sa 7.1% nga pagsulbong sa ekonomiya dinhi.
Sa kaso hinuon sa Agrikultura, bisan sa pa namatikdan nga 9.5% nga pagkahagsak niini, sa kadaku sa pahat sa agrikultura sa eskonomiya sa Bohol, sa 11.7% sa pahat niini sa ekonomiya, mahimo nga wala kaayo mabati sa mga katawhan ang pagka hagsak niining sector.
Ang sector sa Agrikultura, Forestry ug pangisdaan, moangkon sa ikaduha nga industriya nga may labing dako og economic share sa 11.7%.
Bisan pa man niini, ang Bohol pa gihapon ang ming-angkon sa ika tulo nga may labing dako nga tampo sa ekonomiya sa Central Visayas.
Sa kinatibuk-ang P1.29 trilyones nga Gross Regional Domestic Product sa 2022, ang Bohol ming-angkon sa 13.3% sunod sa Cebu nga naa sa 30.1% ug sa Cebu City sa 22.4. (rahc/PIA-7/Bohol)
