“ANG SALAPI maoy tinubdan sa tanang dautan,” suma pa sa usa ka panultihon. Motuo ka ba niini?
Ana-a kini punto o kamatuoran ang maong gisulti. Ngano?
Kay matud pa usab sa laing panultihon, ang kuwarta o salapi giila isip “Segunda de Dios” o ikaduha nga giludhan sa katawhan.
Ikaw, imo ba’ng giludhan ang salapi? Imo ba kining gihigugma labaw pa sa Ginoo?
Ug ang laing bug-at nga pangutana: motuo ka ba og Ginoo? Ug kon mutuo ka nga anaay Ginoo, unsa may imong gibuhat?
Daghang mga tawo sa kalibutan nga kuwarta maoy gipakadak-an. Dili kana malalis.
Ngano kaha nga kuwarta man maoy ilang ultimate goal dinhi sa kalibutan? Kay pinaagi sa kuwarta, “you can do everything” kuno. Makaadto sa lugar nga gustong suruyon ug makapalit sa tanang gustong paliton.
Kon kuwartahan ka, gamhanan ka, kon gamhanan ka, impluwensyado ka. Kahadlukan. Tinahud. Respetado. Inila. KUNO.
Atong ibutang mahimo kang kuwartahan ugma puhon, unsa may imong buhaton? Ug kon kuwartahan ka karon, unsa may imong gibuhat karon?
Kaugalingong kalipay ra ba ang imong gipalabi o nitabang o motabang ka sa uban nga ana-a sa kalisdanan?
Suma pa sa Bibliya, walay kalibutanong bahandi nga madala ngadto sa ginghariang walay katapusan. Dili kini makaluwas sa kalag. Our salvation cannot be bought by wealth or money.
Niining atong pagsige og hisgot sa pang-gobyerno ug pamolitika, kanunay malambigit ang kuwarta.
Sa pamolitika ug pang-gobyerno, wala lage kuno’y forever. Lumalabay lang ang tanan. Ug kana nagpasabot usab nga “let us give chance to other people to lead us”.
Ug ayaw usab kalimte, atong dapigan ang sakto ug makiangayon nga mga binuhatan, ang kamatuoran ug ang demokrasya nga ana-a kita ilawom sa atong Konstitusyon.
Ato gayud panalipdan ang atong mga katungod batok sa mga tampalasan. Baira ang imong kaisog. Ayaw patamak, kay kon magpatamak ka, tamakan ka gayud sa makadaghang higayon.
Ug sa kanunay, atong pakgangon ang nagpahiping lakang sa mga hakog sa salapi, gahum o posisyon. Atong tangtangan sa salimbong ang ilang mga bakak. Pagpakabana! Panginlabot, Sano ug Sana.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
