DAUIS, Bohol (PIA) — Gibuksan sa Department of Tourism (DOT) ang labing unang Tourist Rest Area (TRA) sa Bohol nga nahimutang sa Barangay Poblacion sa lungsod sa Dauis niadtong Disyembre 2, 2023.
Gipangunahan ni DOT Kalihim Christina Garcia Frasco ang paglusad ug opisyal nga turnover kauban ang DOT team, Gregory Oller ug Jetro Nicolas Lozada, assistant chief operation officer sa Tourism Infrastructure and Enterprise Zone Authority (TIEZA).
Ang TRA maoy usa sa mga flagship program sa DOT ubos ni Sec. Frasco ug gipasukad sa tumong sa Departamento nga maghatag kasayon ug kaharuhay sa mga turista, ug ipasiugda ang paghatag og limpyo nga kasilyas alang sa mga turista nga nagbiyahe sa lainlaing mga destinasyon sa turista.
Kini adunay coffee shop, pasalubong ug souvenir store, tourist information area, ug charging station.
“This TRA provides convenience sa atong mga turista aron malipayon ug hamugaway ang ilang biyahe. It has a comfortable lounge, a pasalubong center to support local businesses and MSMEs so that they can sell their products,” matud pa ni Frasco.
Gitubag sa TRA ang numero unong kabalaka sa mga turista base sa usa ka survey nga nagpakita nga 92% sa mga turista mitumbok sa kakuwang sa limpyo ug desente nga mga rest room sa mga lugar sa turismo, pasabot ni Frasco.
Matud pa sa Kalihim, ang turismo nga direksyon ubos sa pamunoan ni Presidente Ferdinand R. Marcos Jr. nag-ila sa panginahanglan sa lig-ong pundasyon. Usa sa mga piho nga katuyoan sa pagpalig-on sa turismo mao ang pagtutok sa imprastraktura nga maoy kritikal sa pagpalambo sa turismo, si Frasco miingon.
Gibutyag pa ni Frasco nga ang nasudnong kagamhanan naglantaw sa Bohol isip usa ka mutya ug tinubdan sa nasudnong garbo samtang iyang gikutlo ang buhat ug ehemplo sa pag-establisar sa kaugalingon isip usa ka malungtarong destinasyon sa eco-turismo ug ngadto sa tibuok kalibutan nga inila nga UNESCO Global Geopark.
Gipahibalo sa kalihim ang umaabot nga procurement phase alang sa rehabilitasyon sa Alona seawall nga iyang gisusi uban ni Gobernador Erico Aristotle Aumentado atol sa groundbreaking sa Dauis TRA niadtong Disyembre sa miaging tuig.
Gitaho usab ni Frasco ang inisyatiba sa DOT sama sa paglusad sa Tourism Promotions Board Travel Philippines mobile app, ang tourist assistance call center ingon man ang pakigtambayayong niini sa Department of Transportation sa pagpalapad sa nasud sa domestic ug international flight portfolio.
Si Provincial Administrator Asteria Caberte, nga nagrepresentar kang Gobernador Aumentado nga tua sa Dubai alang sa Conference of Parties (COP28), nihangop sa pagdugang sa mga pasilidad sa turismo sa probinsiya.
Nagpasalamat siya sa DOT ug TIEZA alang niini nga pamuhunan nga makatabang sa pagpataas sa probinsya ingon usa ka nanguna nga destinasyon sa turista.
Matud pa ni Caberte nga subay kini sa strategic governance agenda sa probinsiya sa malahutayong turismo.
Gipahibalo usab ni Frasco nga 18 pa ka TRAs ang tukoron sa tibuok nasud alang sa 2024.
Giingong 2 pa ka TRA ang gikatakdang tukoron sa Bohol, usa sa syudad sa Tagbilaran ug usa sa lungsod sa Carmen isip kabahin sa pasalig sa DOT.
Atol sa programa, gihatagan ni Frasco og tour guide kits ang 15 ka DOT-accredited tour guides sa Bohol.
Nitambong usab sa maong kalihokan sila Rep. Edgar Chatto sa unang distrito, Dauis Mayor Roman Bullen ug first lady Carmel Bullen, Bise Mayor Miriam Sumaylo, Acting Governor Tita Baja, Board Members Aldner Damalerio, Benjie Arcamo ug Lucille Lagunay, ug Tagbilaran City Mayor Jane Yap. (Elvira Bongosia /PIA7-Bohol)
